បរទេស៖ មន្រ្តីជាន់ខ្ពស់របស់អង្គភាពឆ្មាំបដិវត្តឥស្លាមអ៊ីរ៉ង់ (IRGC) បានព្រមានថា ខ្លួននឹងបើកការវាយប្រហារទៅលើទីក្រុងឌូបៃក្នុងប្រទេសអេមីរ៉ាតអារ៉ាប់រួម និងទីក្រុង ហៃហ្វា នៅប្រទេសអ៊ីស្រាអែល ប្រសិនបើទឹកដីអ៊ីរ៉ង់ត្រូវបានទម្លាក់គ្រាប់បែកនាពេលអនាគត។
យោងតាមសារព័ត៌មាន Lucis Philippines ចេញផ្សាយកាលពីថ្ងៃទី៧ ខែមករា ឆ្នាំ២០២០ បានឱ្យដឹងថា នៅក្នុងប៉ុស្តិ៍ Telegram របស់ខ្លួន IRGC បាននិយាយថា ទីក្រុងទាំងពីរនឹងត្រូវបានកំណត់គោលដៅក្នុងប្រតិបត្តិការទី ៣ ប្រសិនបើអ៊ីរ៉ង់ត្រូវបានទម្លាក់គ្រាប់បែកមកលើនោះ។
ការព្រមាននេះបានកើតឡើងប៉ុន្មានម៉ោងបន្ទាប់ពីអ៊ីរ៉ង់បានបើកការវាយប្រហារជាបន្តបន្ទាប់ទៅលើគោលដៅអាមេរិកនៅអ៊ីរ៉ាក់រួមទាំងការដាក់មូលដ្ឋានទ័ពចំនួន ២ នៅ Al-Asad និង Erbil ជាមួយមីស៊ីលផ្លោងរាប់សិបគ្រាប់ចំពេលមានភាពតានតឹងកើនឡើងបន្ទាប់ពីការសម្លាប់ឧត្តមសេនីយ៍ជាន់ខ្ពស់ អ៊ីរ៉ង់ លោក Qassem Soleimani ក្នុងការវាយប្រហារតាមអាកាសរបស់អាមេរិក កាលពីសប្ដាហ៍មុន។
ការវាយប្រហារមីស៊ីលនេះធ្វើឡើងដើម្បីជាការសងសឹកចំពោះការសម្លាប់លោក Soleimani ។ ក្រុងតេអេរ៉ង់បានគំរាមវាយប្រហារពីដែនអាកាសទៅលើអាមេរិកប្រសិនបើវ៉ាស៊ីនតោនឆ្លើយតបនឹងការវាយប្រហារមីស៊ីល៕
ប្រែសម្រួលៈ ណៃ តុលា
