បរទេស៖ ប្រេសិតពិសេស ប្រចាំនៅប្រទេសយេម៉ែន របស់អង្គការសហប្រជាជាតិ តាមសេចក្តីរាយការណ៍ បាននិយាយប្រាប់ឲ្យដឹង នៅពេលថ្មីៗនេះថា យ៉ាងហោចណាស់មានទាហានចំនួន៨០នាក់ បានស្លាប់បាត់បង់ជីវិត នៅក្នុងហេតុការណ៍ វាយប្រហារតាមអាកាស ទៅលើជំរំយោធាមួយ នៅក្នុងប្រទេសយេម៉ែន។
យោងតាមប្រភពព័ត៌មាន ពីទីភ្នាក់ងារសារព័ត៌មាន UPI នៅរាត្រីថ្ងៃទី១៩ ខែមករា ឆ្នាំ២០២០ បានឲ្យដឹងថា ចំណែកទាហាន ចំនួន១៣០នាក់ផ្សេងទៀត បានទទួលរងរបួស ក្នុងការវាយប្រហារ ដោយគ្រាប់មីស៊ីលនិងកូនដ្រូននោះ ក្នុងខណៈពួកគេ កំពុងតែចូលរួមសូត្រធម៌បួងសួង នៅវិហារក្នុងជំរំយោធា Al-Estiqbal ក្នុងទីក្រុង Marib។
ប្រេសិតពិសេស អង្គការសហប្រជាជាតិ ប្រចាំនៅប្រទេសយេម៉ែន លោក Martin Griffiths បាននិយាយប្រាប់ដូច្នេះថា “ខ្ញុំបាននិយាយពីមុនហើយថា ការវិវត្តទៅមុខដែលប្រទេសយេម៉ែន បានបង្កើតឡើងដ៏លំបាក លើការបញ្ឈប់ភាពតានតឹង មិនឲ្យកើនឡើងនោះ គឺផុតស្រួយខ្លាំងណាស់ ហើយសកម្មភាពបែបនេះ អាចនឹងរំខានដល់ការវិវត្តទៅមុខនេះ។
ខ្ញុំសូមជំរុញឲ្យគ្រប់ភាគីទាំងអស់ ឈប់បង្កឲ្យមានភាពតានតឹង កើនឡើងនៅក្នុងពេលបច្ចុប្បន្ននេះ និងនាំយកថាមពលរបស់ខ្លួន ចេញឲ្យឆ្ងាយពីការប្រឈមមុខដោយយោធា ហើយងាកចូលទៅក្នុងនយោបាយ”៕ ប្រែសម្រួល៖ប៉ាង កុង
