បរទេស៖ គ្រោះមហន្តរាយធម្មជាតិរញ្ជួយដី នេះបានឆក់យកអាយុជីវិតមនុស្សយ៉ាងតិច ១៨ នាក់ និងបន្សល់ទុកមនុស្ស ៥៥៣ នាក់ទៀតរងរបួស ខណៈក្រុមជួយសង្គ្រោះ នៅតែព្យាយាមជួយសង្គ្រោះអ្នកដែលស្ថិតនៅក្រោមគំនរបាក់បែក។ ការរញ្ជួយដីនេះ ក៏បានរង្គោះរង្គើដល់ប្រទេសស៊ីរី និងអ៊ីរ៉ាក់ លីបង់និងអ៊ីស្រាអែលផងដែរ។
យោងតាមសារព័ត៌មាន Sputnik ចេញផ្សាយនៅថ្ងៃទី២៥ ខែមករា ឆ្នាំ២០២០ បានឱ្យដឹងថា មជ្ឈមណ្ឌលសិក្សារញ្ជួយដីមេឌីទែរ៉ាណេអឺរ៉ុប (EMSC) បានរាយការណ៍ថា ការរញ្ជួយដីកម្រិត ៦.៨ រិចទ័របានវាយប្រហារភាគខាងកើត ប្រទេសតួកគីនៅម៉ោង ៨ និង ៥៥ នាទីល្ងាចម៉ោងក្នុងស្រុក កាលពីថ្ងៃសុក្រ។ ចំណុចកណ្តាលនៃការរញ្ជួយដីនេះស្ថិតនៅចម្ងាយ ២១០ គីឡូម៉ែត្រ ភាគឦសាននៃតំបន់ Gaziantep និង ១០ គីឡូម៉ែត្រខាងជើងក្រុង Doganyol នៅជម្រៅ ២ គីឡូម៉ែត្រ។
រដ្ឋមន្រ្តីក្រសួងមហាផ្ទៃតួកគីលោក Suleyman Soylu បាននិយាយថា ការរញ្ជួយដីបានសម្លាប់មនុស្ស យ៉ាងហោចណាស់ ១៨ នាក់ និង ធ្វើឲ្យ មនុស្ស ៥៥៣ នាក់ផ្សេងទៀតរងរបួស។ យ៉ាងហោចណាស់មានមនុស្ស ៣០នាក់ ត្រូវបានគេរាយការណ៍ថាកំពុងស្ថិតនៅក្រោ មគំនរបាក់បែកនៅឡើយ។
យោងតាម EMSC ដែលបានមើលឃើញផែនទី នៃតំបន់ដែលរងផលប៉ះពាល់ការរញ្ជួយនេះ អាចត្រូវបានទទួលការរំញ័រ ដល់ប្រជាជនប្រហែល ១២០ លាននាក់៕
ប្រែសម្រួលៈ ណៃ តុលា
