ប៉េកាំង ៖ មនុស្សជាង ៥ លាននាក់ បានចាកចេញពីទីក្រុងវូហាន ចាប់តាំងពីការចាប់ផ្តើម នៃការផ្ទុះឡើង នៃវីរុសឆ្លងធ្ងន់ធ្ងរ ឬកូរ៉ូណាវីរុស។
យោងតាមសារព័ត៌មាន Sputnik ចេញផ្សាយកាលពីថ្ងៃទី២៦ ខែមករា ឆ្នាំ២០២០ បានឱ្យដឹងដោយផ្អែកតាមការលើកឡើងរបស់លោក Zhou Xianwang បាននិយាយនៅឯសន្និសីទខ្លីមួយថា «ក្រោមឥទិ្ធពលនៃឆ្នាំថ្មី និងស្ថានភាពរាតត្បាត មនុស្សច្រើនជាង ៥លាននាក់បានចាកចេញពីទីក្រុង វូហាន ហើយឥឡូវនេះប្រជាជនជាង ៩លាននាក់ទៀត នៅតែបន្តនៅក្នុងទីក្រុង» ។
សូមជម្រាបថា ទីក្រុង វូហាន ប្រទេសចិន បានស្ថិតនៅក្នុងការបិទទ្វារ ជាក់ស្តែងចាប់តាំងពីថ្ងៃទី ២៣ ខែមករា ខណៈដែលអាជ្ញាធរចិន កំពុងចាត់វិធានការយ៉ាងម៉ឺងម៉ាត់ ដើម្បីទប់ស្កាត់ការរីករាលដាល នៃវីរុស ដែលមិនធ្លាប់បានឃើញ ដែលត្រូវបានគេនិយាយថា មានប្រភពចេញ ពីទីផ្សារអាហារសមុទ្រ ក្នុងស្រុក ។ អាជ្ញាធរបានផ្អាករាល់ការដឹកជញ្ជូន ក្នុងនិងក្រៅទីក្រុង ហើយបានណែនាំអោយប្រជាជនរបស់ខ្លួន ស្នាក់នៅក្នុងផ្ទះប្រសិនបើអាច។
សូមបញ្ជាក់ថា អ្នកស្លាប់ដោយសារជំងឺរលាកសួត ឬវីរុសកូរ៉ូណាវីរុស បានកើនដល់ជិត៨០នាក់ និងឆ្លងជាង២.៥០០ករណីទៀត ហើយ ប្រទេសថៃ ជប៉ុន កូរ៉េខាងត្បូង វៀតណាម សឹង្ហបុរី នេប៉ាល់ បារាំង សហរដ្ឋអាមេរិក ម៉ាឡេស៊ី អូស្ត្រាលី និងកាណាដា បានបញ្ជាក់ពីករណីឆ្លង នៅក្នុងប៉ុន្មានថ្ងៃថ្មីៗនេះ ។ ករណីទី ៥ នៃជំងឺឆ្លងវីរុស នៅសហរដ្ឋអាមេរិក ត្រូវបានបញ្ជាក់ នៅក្នុងតំបន់ Maricopa County រដ្ឋ Arizona កាលពីថ្ងៃអាទិត្យ ៕
ប្រែសម្រួលៈ ណៃ តុលា
