អ៊ីស្តង់ប៊ុល៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី១៨ ខែកុម្ភៈ ឆ្នាំ២០២០ថា យោងតាមការផ្សព្វផ្សាយ ដោយប្រព័ន្ធព័ត៌មានផ្សាយសំឡេងរដ្ឋ TRT បានឲ្យដឹងថា ក្រុមសុភាចារបុរសតួកគី នៅថ្ងៃអង្គារនេះ បានប្រកាសអំពីការចាប់ខ្លួន ជនសង្ស័យ ៤៦៧នាក់ ដែលសង្ស័យថាមានជាប់ពាក់ព័ន្ធ នឹងរឿងដែលនៅពីក្រោយខ្នង នៃការប៉ុនប៉ងធ្វើរដ្ឋប្រហារបរាជ័យ នៅក្នុងឆ្នាំ២០១៦ ។
ប៉ូលិស បានបើកប្រតិបត្តិការនៅក្នុងខេត្តចំនួន ៦៧ នៅទូទាំងប្រទេស ដើម្បីតាមចាប់ក្រុមជនសង្ស័យ ។ TRT បានឲ្យដឹងដូច្នេះ ។
ជនសង្ស័យ ត្រូវបានគេចោទប្រកាន់ថា សកម្មភាពរបស់ពួកគេ នៅក្នុងការរៀបចំអំពើក្បត់ដោយមានបណ្តាញ ដែលមានមេដឹកនាំធំដែលមានមូលដ្ឋាន នៅសហរដ្ឋអាមេរិក គឺលោកអាចារ្យតួកគីម្នាក់ឈ្មោះ Fethullah Gulen ។
រដ្ឋាភិបាលតួកគី បានស្តីបន្ទោសដល់លោក Gulen និងបណ្តាញរបស់គាត់ ថាជាក្រុមប៉ុនប៉ងធ្វើរដ្ឋប្រហារ នៅក្នុងខែកក្កដា ឆ្នាំ២០១៦ ដែលមានមនុស្ស ២៥០នាក់ត្រូវបានសម្លាប់ ៕
ប្រែសម្រួលដោយ៖ ម៉ៅ បុប្ផាមករា
