រុស្ស៊ី៖ អាមេរិកកំពុងត្រួសត្រាយផ្លូវ ដើម្បីដាក់ពង្រាយមីស៊ីល បាញ់រយៈចម្ងាយជិត និងចម្ងាយមធ្យម នៅអឺរ៉ុប និងអាស៊ី

បរទេស៖ មុននេះ រដ្ឋាភិបាលទីក្រុងមូស្គូ បានអំពាវនាវឲ្យ អាមេរិកជៀសវាងការដាក់ពង្រាយ មីស៊ីលនៅជិតព្រំដែនប្រទេសរុស្ស៊ី បន្ទាប់ពីរដ្ឋាភិបាលក្រុងវ៉ាស៊ីនតោន បានដកខ្លួនពីសន្ធិសញ្ញា កម្លាំងនុយក្លេអ៊ែរកម្រិតមធ្យម (INF) ដោយសង្កត់ធ្ងន់ថា វានឹងនាំទៅរកការចុះខ្សោយ នៃប្រព័ន្ធត្រួតពិនិត្យអាវុធពិភពលោក។

យោងតាមសារព័ត៌មាន Sputnik ចេញផ្សាយនៅថ្ងៃទី១៧ ខែកុម្ភៈ ឆ្នាំ២០២០ បានឱ្យដឹងថា រដ្ឋមន្ត្រីការបរទេសរុស្ស៊ីលោក Sergei Lavrov បានថ្លែងបន្ទាប់ពីទស្សនា សន្និសីទសន្តិសុខទីក្រុង Munich ប្រទេសអាល្លឺម៉ង់ថា សហរដ្ឋអាមេរិកកំពុងរៀបចំមូលដ្ឋាន ដើម្បីដាក់ពង្រាយមីស៊ីលដែលត្រូវបាន ហាមឃាត់ពីមុនដោយកិច្ចព្រមព្រៀង INF នៅអឺរ៉ុបអាស៊ី និងនៅបណ្តាកោះ នៅមហាសមុទ្រប៉ាស៊ីហ្វិក។

រដ្ឋមន្រ្តីរបស់រុស្ស៊ីរូបនេះថា «ជាការពិតយើងនឹងពិភាក្សា បញ្ហានេះជាមួយបារាំង ប៉ុន្តែដើម្បីឈានដល់កិច្ចព្រមព្រៀងលម្អិត យើងត្រូវការការចរចាពហុភាគី ការពិគ្រោះយោបល់, ពហុភាគីដែលជាការពិតរួមបញ្ចូល សហរដ្ឋអាមេរិកដែលបានបំផ្លាញសន្ធិសញ្ញា [INF] ហើយឥឡូវនេះកំពុងដំណើរការយ៉ាងសកម្ម។ មធ្យោបាយសម្រាប់ការដាក់ពង្រាយ អាវុធដែលត្រូវហាមឃាត់ពីមុននៅអឺរ៉ុប និងនៅក្នុងទ្វីបអាស៊ីផងដែរ ហើយពួកគេមិនអាចលាក់វាបានឡើយ។

សូមជម្រាបថា ប្រធានាធិបតីអាមេរិក លោក ដូណាល់ត្រាំ បានប្រកាសពីការសម្រេច ដកខ្លួនចេញពីកិច្ចព្រមព្រៀងឆ្នាំ ១៩៨៧ INF ថ្ងៃទី ២ ខែកុម្ភៈឆ្នាំ ២០១៩ ។ ទីក្រុងវ៉ាស៊ីនតោនបានអះអាងថា ខ្លួនកំពុងចាកចេញពីសន្ធិសញ្ញានេះ ដោយសារតែមានការរំលោភ បំពានដោយទីក្រុងមូស្គូ ទោះបីជារុស្ស៊ីបានប្រកាន់ខ្ជាប់ នូវកិច្ចព្រមព្រៀងនេះក៏ដោយ បើទោះបីជាមានការព្រួយបារម្ភស្រដៀងគ្នា អំពីការអនុលោមរបស់អាមេរិកក៏ដោយ ៕

ប្រែសម្រួលៈ ណៃ តុលា