ណៃពិដោ ៖ ប្រទេសមីយ៉ាន់ម៉ា បានទទួលថវិកាជាង ៦,៧ លានដុល្លារ ពីប្រទេសចិន ក្រោមមូលនិធិ ពិសេស នៃកិច្ចសហប្រតិបត្តិការ Lancang-Mekong (LMC) យោងតាមការចេញផ្សាយ ពីគេហទំព័រឆៃណាឌៀលី ។
ពិធីចុះហត្ថលេខាលើកិច្ចព្រមព្រៀង ស្តីពីការផ្ទេរមូលនិធិ សម្រាប់គម្រោងពិសេស LMC (២០២០) ត្រូវបានធ្វើឡើងនៅរដ្ឋធានីណៃពិដោ “NAY PYI TAW”របស់ប្រទេសមីយ៉ាន់ម៉ា។ ក្នុងពិធីនោះឯកអគ្គរដ្ឋទូតចិន ប្រចាំនៅមីយ៉ាន់ម៉ា លោក Chen Hai បានកត់សម្គាល់ថា ចិន និងមីយ៉ាន់ម៉ា នឹងធ្វើជាសហប្រធាននៃ LMC នៅឆ្នាំ ២០២០ ។
លោក Chen បាននិយាយថា ប្រទេសចិន និងមីយ៉ាន់ម៉ា ដែលជាដៃគូ សហប្រតិបត្តិការធម្មជាតិ និងសហគមន៍ នៃអនាគតរួមគ្នាមួយ ពិតជាអាចនាំមកនូវ គុណសម្បត្តិបន្ថែមដើម្បីដោះស្រាយបញ្ហាប្រឈមរួម របស់ពួកគេជាមួយគ្នា និងបើកទំព័រថ្មីមួយនៅក្នុងកិច្ចសហប្រតិបត្តិការ ឡានឆាង – មេគង្គ។
ប្រទេសមីយ៉ាន់ម៉ា នឹងប្រើប្រាស់មូលនិធិ សម្រាប់គម្រោងចំនួន ២២ នៅក្នុងវិស័យកសិកម្មការអប់រំ និងបច្ចេកវិទ្យាព័ត៌មានវិទ្យា និងវិស័យផ្សេងៗទៀត។ កិច្ចព្រមព្រៀងលើគម្រោង នៃមូលនិធិ ពិសេសណៃពិដោ សម្រាប់មីយ៉ាន់ម៉ា (បាច់ដំបូង) មានតម្លៃ ២,៤ លានដុល្លារ ត្រូវបានចុះហត្ថលេខា កាលពីខែមករាឆ្នាំ ២០១៨ ដើម្បីជួយដល់គម្រោងចំនួន ១០ ដែលត្រូវបានអនុវត្ត នៅក្នុងប្រទេសមីយ៉ាន់ម៉ា ។
ប្រទេសចិន បានផ្តួចផ្តើមមូលនិធិពិសេស LMC ក្នុងអំឡុងពេលប្រជុំមេដឹកនាំ LMC លើកដំបូង នៅក្នុងខែមីនាឆ្នាំ ២០១៦ ក្នុងគោលបំណងគាំទ្រ ដល់គម្រោង សហប្រតិបត្តិការខ្នាតតូច និងមធ្យមដែលដាក់ចេញ ដោយប្រទេសឡានឆាង – មេគង្គទាំង ៦ ។ ប្រទេសឡានឆាង-មេគង្គទាំង ៦ រួមមានប្រទេសចិនកម្ពុជា ឡាវ មីយ៉ាន់ម៉ា វៀតណាម និងថៃ៕
ដោយ៖លី ភីលីព
