បរទេស៖ ការជំរុញរបស់ក្រសួង ការបរទេសអាមេរិក ក្នុងការបញ្ចូលឃ្លាថា “ វីរុសវូហាន” នៅក្នុងសេចក្តីថ្លែងការណ៍រួម ជាមួយសមាជិកក្រុម ៧ ផ្សេងទៀត បន្ទាប់ពីការប្រជុំ របស់រដ្ឋមន្ត្រីការបរទេស ស្តីពី វីរុសកូរ៉ូណា កាលពីថ្ងៃពុធ ត្រូវបានច្រានចោល ដែលបណ្តាលឱ្យមានសេចក្តីថ្លែង ការណ៍ដាច់ដោយឡែក និងការបែងចែកនៅក្នុងក្រុម។
យោងតាមសារព័ត៌មាន CNN ចេញផ្សាយកាលពីថ្ងៃទី២៦ ខែមីនា ឆ្នាំ២០២០ បានឱ្យដឹងថា អ្នកការទូតអឺរ៉ុបម្នាក់ បាននិយាយថា“ អ្វីដែលក្រសួងការបរទេស អាមេរិកបានលើកឡើង គឺខ្សែបន្ទាត់ក្រហម ។ អ្នកមិនអាចយល់ស្របជាមួយ នឹងការដាក់ស្លាកសញ្ញានៃវីរុសនេះ ហើយព្យាយាមទាក់ទងវាបានទេ ។
អ្នកការទូតរូបនេះបានប្រាប់ CNN ថា សេចក្តីថ្លែងការណ៍ព្រាង ស្នើដោយសហរដ្ឋអាមេរិក ក៏បានស្តីបន្ទោសប្រទេសចិន ចំពោះការរីករាលដាល នៃជំងឺរាតត្បាតនេះផងដែរ។
ទោះបីជាអង្គការសុខភាពពិភពលោក បានដាក់ឈ្មោះជាផ្លូវការនូវជំងឺនេះថា Covid-19 ឬវីរុសកូរ៉ូណា ក៏ដោយសេចក្តីថ្លែងការណ៍ សេចក្តីព្រាង ១២ កថាខណ្ឌដែលផ្សព្វផ្សាយដោយ សហរដ្ឋអាមេរិកក្នុងចំណោមរដ្ឋមន្រ្តី G7 បានចាត់ទុក វាថាជាវីរុសវូហាន ដោយសារតែសហរដ្ឋអាមេរិក កាន់តំណែងប្រធានសម្ព័ន្ធអន្តរជាតិ – ដែលរួមបញ្ចូលទាំងចក្រភពអង់គ្លេស បារាំង អាល្លឺម៉ង់ អ៊ីតាលី ជប៉ុន និងកាណាដាផងដែរ ដែលខ្លួនទទួលខុសត្រូវ ក្នុងការចេញសេចក្តីព្រាង សេចក្តីថ្លែងការណ៍រួមនេះ ៕
ប្រែសម្រួលៈ ណៃ តុលា
