សេអ៊ូល៖ ប្រទេសកូរ៉េខាងត្បូង បានឲ្យដឹងនៅថ្ងៃអង្គារនេះថា ខ្លួននឹងធ្វើកិច្ចចរចាលើកទី ៧ ជាមួយប្រទេសចិននៅសប្តាហ៍នេះ ដើម្បីពិភាក្សាអំពីការពង្រីកវិសាលភាពនៃកិច្ចព្រមព្រៀងពាណិជ្ជកម្មសេរីទ្វេភាគី (FTA) របស់ប្រទេសទាំងពីរ ដើម្បីគ្របដណ្តប់លើវិស័យសេវាកម្ម និងការវិនិយោគ។
យោងតាមក្រសួងពាណិជ្ជកម្ម ឧស្សាហកម្ម និងថាមពលបានឱ្យដឹងថា ប្រទេសទាំងពីរនឹងចាប់ផ្តើមការប្រជុំនិម្មិតរយៈពេល ៤ ថ្ងៃនៅថ្ងៃអង្គារនេះ ដើម្បីបង្កើនល្បឿនវឌ្ឍនភាពចំពេលមានការរីករាលដាល នៃជំងឺឆ្លងកូវីដ-១៩ ដែលបង្កការកកស្ទះដល់ការធ្វើដំណើរ និងសេដ្ឋកិច្ចពិភពលោក។
ការប្រជុំមុនត្រូវបានធ្វើឡើងនៅទីក្រុងប៉េកាំង កាលពីខែវិច្ឆិកា ឆ្នាំមុន។ ទីក្រុងសេអ៊ូល និងទីក្រុងប៉េកាំង បានអនុវត្តកិច្ចព្រមព្រៀងពាណិជ្ជកម្មសេរី (FTA) កាលពីខែធ្នូ ឆ្នាំ២០១៥ ដើម្បីកាត់បន្ថយពន្ធលើទំនិញ៕ដោយ ឈូក បូរ៉ា
