បរទេស៖ ក្រសួងកសិកម្ម និងអភិវឌ្ឍន៍ជនបទ របស់វៀតណាម (MARD) បានអនុញ្ញាត ឱ្យនាំចូលជ្រូករស់ពីប្រទេសថៃ សម្រាប់ចិញ្ចឹម និងយកសាច់ ចាប់ពីថ្ងៃសុក្រ តទៅ។
យោងតាមសារព័ត៌មាន Vietnam News ចេញផ្សាយនៅថ្ងៃទី១២ ខែមិថុនា ឆ្នាំ២០២០ បានឱ្យដឹងថា នេះជាលើកទីមួយហើយ ដែលវៀតណាម បានផ្តល់ភ្លើងខៀវ ដល់ការនាំចូលជ្រូករស់ ក្នុងគោលបំណង ដើម្បីប្រឆាំង នឹងតម្លៃជ្រូកលើទីផ្សារក្នុងស្រុក ដែលបានឡើងស្រឺតៗ។
នៅក្នុងឯកសារ ដែលបានផ្ញើ កាលពីថ្ងៃព្រហស្បតិ៍ ក្រសួងបានចាត់ឱ្យនាយកដ្ឋាន សុខភាពសត្វរបស់ខ្លួន ចេញសេចក្តីណែនាំលម្អិត ស្តីពីវិធានការអនាម័យ សម្រាប់សត្វជ្រូក ដែលបាននាំចូល ស្របតាមបទបញ្ជា ដែលមានស្រាប់ ដើម្បីការពារជំងឺសត្វ និងធានាសុវត្ថិភាព ដល់ហ្វូងសត្វក្នុងស្រុក។
ប្រធានមន្ទីរក៏ទទួលខុសត្រូវ ក្នុងការជំរុញ ការសម្របសម្រួលរបស់ខ្លួន ជាមួយទីភ្នាក់ងារអន្តរវិស័យ នៅកំពង់ផែ ច្រកចូលនិងអាជ្ញាធរមូលដ្ឋាន ដើម្បីគ្រប់គ្រងការនាំចូល យ៉ាងតឹងរឹង។
ឥឡូវនេះមានអាជីវកម្មថៃ ចំនួន ៨ ដែលមានកសិដ្ឋានស្របច្បាប់ ដើម្បីចុះបញ្ជីការនាំជ្រូក របស់ពួកគេទៅកាន់ប្រទេសវៀតណាម។ ចំនួនអាជីវកម្មថៃ ដែលមានសិទ្ធិនាំចេញជ្រូកទៅវៀតណាម អាចនឹងកើនឡើង ប្រសិនបើប្រទេសវៀតណាម មានតម្រូវការខ្ពស់ សម្រាប់ការចិញ្ចឹមជ្រូក សម្រាប់ការសម្លាប់យកសាច់៕
ប្រែសម្រួលៈ ណៃ តុលា
