បរទេស ៖ កងទ័ពរបស់ប្រទេសឥណ្ឌា បាននិយាយ នៅថ្ងៃអង្គារសប្ដាហ៍នេះថា ទាហានខ្លួនចំនួន២០នាក់ បានស្លាប់បាត់បង់ជីវិត នៅក្នុងការប៉ះទង្គិតគ្នាមួយជាមួយកងទ័ពចិន នៅតាមតំបន់ព្រំដែនមានជម្លោះ បង្កការតានតឹងខ្លាំងបំផុត នៃការជាប់គាំងមួយសប្ដាហ៍ រវាងយក្សអាស៊ីទាំងពីរ នៅជួរភ្នំហិមាល័យ ភាគខាងលិច។
ក្រសួងការបរទេសចិន បានធ្វើការបញ្ជាក់ថា មានការប្រឈមមុខដាក់គ្នា ដោយហិង្សាមួយ កាលពីថ្ងៃចន្ទ នៅក្នុងតំបន់ព្រំដែន ហើយមិនបាននិយាយដល់រឿងអ្នករងគ្រោះនោះទេ ប៉ុន្តែក្រសួងការបរទេសឥណ្ឌា បាននិយាយប្រាប់ថា ទាំងពីរខាងសុទ្ធតែមានជនរងគ្រោះ នៅក្នុងហេតុការណ៍ប៉ះទង្គិចគ្នានោះ។
គួរបញ្ជាក់ថា ការស្លាប់នេះ គឺជាហេតុការណ៍ដំបូងបំផុត ចាប់តាំងពីមានជម្លោះព្រំដែនដ៏ធំបំផុត ចុងក្រោយក្នុងឆ្នាំ១៩៦៧ រវាងប្រទេសមានអំណាចអាវុធបរិមាណូទាំងពីរ ហើយក៏ជាប្រទេស មានចំនួនប្រជាជនច្រើនបំផុត លើពិភពលោក ដែលមិនអាចដោះស្រាយជម្លោះនៅតាមបណ្ដោយព្រំដែន ដ៏វែងរបស់ពួកគេបាន៕
ប្រែសម្រួល៖ប៉ាង កុង
