បរទេស៖ មន្ត្រីនាំពាក្យក្រសួងការបរទេសចិន តាមសេចក្តីរាយការណ៍ បាននិយាយនៅថ្ងៃចន្ទនេះថា ប្រទេសចិននឹងរីករាយបន្ត សហការយ៉ាងល្អជាមួយ អ្នកសារព័ត៌មានអាមេរិក នៅក្នុងប្រទេស ប្រសិនបើអ្នកកាសែតចិននៅអាមេរិក ក៏ទទួលបានការធ្វើដូចគ្នានេះដែរ។
លោកស្រី Hua Chunying បាននិយាយលើបណ្ដាញសង្គមធ្វីតធ័រថា ប្រទេសចិនកំពុងតែដំណើរការ ពាក្យសុំបន្ដទិដ្ឋាការ ដែលអ្នកកាសែតអាមេរិកខ្លះបានដាក់ ដោយម្នាក់គឺជាធ្វើការឲ្យទីភ្នាក់ងារ សារព័ត៌មានស៊ីអិនអិន និងថា អ្នកកាសែតដែលទទួលរងផលប៉ះពាល់ អាចបន្តរស់នៅនិងធ្វើការងារនៅចិន ដោយគ្មានបញ្ហាអ្វីទាំងអស់។
គួរបញ្ជាក់ថា ទីភ្នាក់ងារសារព័ត៌មាន Wall Street Journal និងស៊ីអិនអិន បានរាយការណ៍ថា ម្នាក់ក្នុងចំណោម អ្នកសារព័ត៌មានរបស់ពួកគេ ទទួលបានការចេញលិខិត អនុញ្ញាតឲ្យពួកគេ បន្តធ្វើការងារនៅក្នុងប្រទេសចិន ជាមួយលិខិតសម្គាល់ខ្លួន ដែលផុតកំណត់ ៕
ប្រែសម្រួល៖ ប៉ាង កុង
