វ៉ាស៊ីនតោន ៖ ទូរទស្សន៍សិង្ហបុរី Channel News Asia បានចុះផ្សាយនៅថ្ងៃទី០៨ ខែតុលា ឆ្នាំ២០២០ថា កាលពីថ្ងៃពុធទី ៧ ខែតុលា ទីប្រឹក្សាសន្តិសុខជាតិសហរដ្ឋអាមេរិក បានព្រមានចិន ប្រឆាំងរាល់ការប៉ុនប៉ង ដណ្តើមយកកោះតៃវ៉ាន់ ដោយប្រើកម្លាំងដោយថ្លែងថា ការចុះចតនៅលើកោះ គឺជាការលំបាកគួរឱ្យកត់សម្គាល់ ហើយមានភាពមិនច្បាស់ អំពីរបៀប ដែលសហរដ្ឋអាមេរិកនឹងឆ្លើយតប ។
លោក រ៉ូបឺត អូ ប្រៀន (Robert O’Brien) បានថ្លែងប្រាប់ឲ្យដឹងនៅក្នុងព្រឹត្តិការណ៍មួយនៅឯសាកលវិទ្យាល័យ ណេវ៉ាដាក្នុងទីក្រុងឡាសវេហ្គាស ថា ប្រទេសចិន បានចូលរួម ក្នុងការបង្កើតកងនាវាចរ ដ៏ធំមួយប្រហែលជាមិនត្រូវបានគេមើលឃើញ ចាប់តាំងពីការប៉ុនប៉ង របស់ប្រទេសអាល្លឺម៉ង់ ដើម្បីប្រកួតប្រជែង ជាមួយកងទ័ពជើងទឹកអង់គ្លេស មុនពេលសង្គ្រាមលោកលើកទី១ ។
លោកបានមានថ្លែងថា “ផ្នែកមួយ គឺផ្តល់ឱ្យពួកគេនូវសមត្ថភាព ក្នុងការរុញច្រានពួកយើងចេញពីតំបន់ប៉ាស៊ីហ្វិកខាងលិច និងអនុញ្ញាតឱ្យពួកគេចូលរួមក្នុងការ ចុះចតនៅលើកោះដ៏ធំ គឺនៅកោះតៃវ៉ាន់” ។
លោក បានថ្លែងថា “រវាងចិន និងកោះតៃវ៉ាន់ និងបញ្ហា នៃឆ្នេរខ្សាច់សម្រាប់ការចុះចតនៅលើកោះនោះ បញ្ហានោះ គឺថាការចុះចតទឹកប្រៃ គឺវាពិតជាពិបាកណាស់។ ដោយសំដៅលើទៅចម្ងាយ១៦០គីឡូម៉ែត្រ ។
លោកបានបន្ថែមថា នៅពេលសួរ ថាតើ ជម្រើសរបស់អាមេរិក នឹងមានអ្វីខ្លះ ប្រសិនបើប្រទេសចិន បានព្យាយាមដើម្បីស្រូបយកកោះតៃវ៉ាន់នោះ វាមិនមែនជាកិច្ចការងាយស្រួលនោះទេ ហើយវាក៏មានភាពស្រពេចស្រពិលផងដែរ ៕
ប្រែសម្រួលដោយ៖ ម៉ៅ បុប្ផាមករា
