បរទេស ៖ ក្រសួងការបរទេសរុស្ស៊ី បាននិយាយប្រាប់ថា ប្រទេសរុស្ស៊ី នៅថ្ងៃចន្ទនេះ បានប្រកាសថាមន្ត្រីការទូតប៊ុលហ្គារីពីររូប ជាបុគ្គលមិនគួររាប់រក និងបានពិពណ៌នា ចំពោះការបណ្ដេញនេះថា ជាការឆ្លើយតបចំពោះការបណ្ដេញមន្ត្រី ការទូតរុស្ស៊ីពីររូប កាលពីខែមុន ដោយពីបទសង្ស័យធ្វើចារកម្ម ។
យោងតាមសេចក្តីរាយការណ៍មួយ ចេញផ្សាយដោយទីភ្នាក់ងារសារព័ត៌មាន Us News នៅថ្ងៃទី១២ ខែតុលា ឆ្នាំ២០២០ បានឲ្យដឹងថា ក្រសួងការបរទេសរុស្ស៊ី បាននិយាយក្នុងសេចក្តីថ្លែងការណ៍ដូច្នេះថា ទីក្រុងមូស្គូមើលឃើញទង្វើរបស់ប្រទេស ប៊ុលហ្គារីនោះថា គ្មានមូលដ្ឋាន។
គួរបញ្ជាក់ថា ប្រទេសប៊ុលហ្គារី ជាសមាជិកអង្គារណាតូ ដែលជាធម្មតាមានចំណងមិត្តភាពល្អជាមួយរុស្ស៊ី បានបណ្ដេញមន្ត្រីការទូតរុស្ស៊ី៣រូប ផ្សេងទៀត ជុំវិញបទចោទប្រកាន់អំពីការធ្វើចារកម្ម គិតចាប់តាំងពីខែតុលាមក ហើយប្រទេសនេះ ក៏បដិសេធមិនផ្តល់ទិដ្ឋាការឲ្យ ដល់មេធាវីការពារក្តីរបស់រុស្ស៊ី កាលពីខែធ្នូផងដែរ៕
ប្រែសម្រួល៖ប៉ាង កុង
