ព័ត៌មានអន្តរជាតិ

ជប៉ុន ប្រាប់កូរ៉េខាងត្បូងថា ខ្លួននឹងរំលង កិច្ចប្រជុំកំពូលត្រីភាគី ជុំវិញជម្លោះការងារជាមួយក្រុងសេអ៊ូល

តូក្យូ៖ ប្រភពពីការទូតបានឲ្យដឹងថា កិច្ចប្រជុំកំពូលត្រីភាគីរវាងជប៉ុន កូរ៉េខាងត្បូង និងចិន ទំនងជាមិនត្រូវបានធ្វើឡើង នៅឆ្នាំនេះទេ ដោយសារទីក្រុងតូក្យូ បានជូនដំណឹងថា លោកនាយករដ្ឋមន្រ្តី នឹងមិនចូលរួម ដោយគ្មានការរីកចម្រើន ក្នុងការដោះស្រាយ ជម្លោះទ្វេភាគី ជាមួយក្រុងសេអ៊ូល ជុំវិញសំណងសម្រាប់ កម្លាំងពលកម្មពេលសង្គ្រាមនោះទេ។ ។

ប្រទេសកូរ៉េខាងត្បូង ត្រូវបានគេគ្រោងធ្វើជាម្ចាស់ផ្ទះ នៃកិច្ចប្រជុំកំពូលត្រីភាគី ដែលត្រូវបានធ្វើឡើង ប្រហែលមួយដង ក្នុងមួយឆ្នាំ ចាប់តាំងពីឆ្នាំ ២០០៨ ដែលជាវេទិកាមួយ ដើម្បីពិភាក្សាអំពី កិច្ចសហប្រតិបត្តិការ សេដ្ឋកិច្ចក៏ដូចជាបញ្ហា ក្នុងតំបន់រួមទាំងប្រទេសកូរ៉េខាងជើង ផងដែរ។

ប៉ុន្តែយោងតាមប្រភពព័ត៌មាន បានឲ្យដឹងថា ប្រទេសជប៉ុន បានប្រាប់កូរ៉េខាងត្បូង នៅចុងខែកញ្ញាថា ខ្លួនមិនអាចទៅរួចទេ សម្រាប់លោកនាយករដ្ឋមន្រ្តី ក្នុងការធ្វើទស្សនកិច្ចលើកលែងតែមាន“ វិធានការណ៍សមស្រប” ដើម្បីដោះស្រាយ កង្វល់របស់ខ្លួន។

ទំនាក់ទំនងរវាងទីក្រុងតូក្យូ និងសេអ៊ូល បានធ្លាក់ចុះដល់កម្រិតអាក្រក់បំផុត ក្នុងរយៈពេលប៉ុន្មានឆ្នាំបន្ទាប់ពីការសម្រេចរបស់តុលាការកំពូលរបស់កូរ៉េខាងត្បូង កាលពីខែតុលា ឆ្នាំ២០១៨ បានបញ្ជាឱ្យក្រុមហ៊ុនជប៉ុន បង់ប្រាក់សំណង ដល់បុរស៤នាក់ ពីពលកម្មដោយបង្ខំ ក្នុងកំឡុងឆ្នាំ១៩១០-១៩៤៥ នៃការគ្រប់គ្រងអាណានិគម លើឧបទ្វីបកូរ៉េ៕

ដោយ ឈូក បូរ៉ា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top