សេអ៊ូល៖ ប្រព័ន្ធផ្សព្វផ្សាយរដ្ឋកូរ៉េខាងជើង បានឲ្យដឹងថាវិធានការកំចាត់មេរោគ គឺជាភារកិច្ចអាទិភាពមួយ នៃយុទ្ធនាការ ៨០ ថ្ងៃ ដែលមេដឹកនាំលោក គីម ជុងអ៊ុន កំពុងជំរុញ ដើម្បីជំនះការខូចខាតពីគ្រោះទឹកជំនន់ និងធ្វើឱ្យមានការរីកចម្រើន ផ្នែកសេដ្ឋកិច្ចនៅចុងឆ្នាំនេះ។
ក្នុងកិច្ចប្រជុំសំខាន់មួយ របស់គណបក្សពលករ កំពុងកាន់អំណាចនៅដើមខែនេះ លោកគីម បានចាប់ផ្តើមយុទ្ធនាការ ៨០ ថ្ងៃ ដើម្បីសម្រេចគោលដៅជាតិ និងសេដ្ឋកិច្ចរបស់ប្រទេសនៅចុងឆ្នាំនេះ មុនពេលសមាជគណបក្សដ៏កម្រមួយ ដែលគ្រោងនឹងធ្វើនៅខែមករា។
ទីភ្នាក់ងារព័ត៌មានកណ្តាលកូរ៉េ (KCNA) បានចុះផ្សាយថា “យើងបានកំណត់ ការពង្រឹងកិច្ចប្រឹងប្រែង កំចាត់មេរោគទូទាំងប្រទេស និងប្រកាន់ខ្ជាប់យ៉ាងម៉ឺងម៉ាត់ ចំពោះការការពារវីរុស ដែលជាគោលដៅសំខាន់ នៃយុទ្ធនាការរយៈពេល ៨០ ថ្ងៃ”៕ ដោយ៖ ឈូក បូរ៉ា
