ប្រធានាធិបតីអាមេរិក លោកដូណាល់ត្រាំ ចុះហត្ថលេខាលើបទបញ្ជាប្រតិបត្តិ ហាមជនជាតិអាមេរិក វិនិយោគជាមួយក្រុមហ៊ុន ទាក់ទងនឹងយោធាចិន

បរទេស៖ ប្រធានាធិបតីអាមេរិក លោកដូណាល់ត្រាំ បានចុះហត្ថលេខាលើ បទបញ្ជាប្រតិបត្តិមួយ ហាមជនជាតិអាមេរិកមិនឱ្យ វិនិយោគជាមួយក្រុមហ៊ុនរាប់ សិបដែលធ្វើជំនួញជាមួយកងទ័ពរំដោះប្រជាជនចិន (PLA) ។

យោងតាមសារព័ត៌មាន Sputnik ចេញផ្សាយនៅថ្ងៃទី១៣ ខែវិច្ឆិកា ឆ្នាំ២០២០ បានឱ្យដឹងថា បទបញ្ជាប្រតិបត្តិកាលពីថ្ងៃព្រហស្បតិ៍ គឺរារាំងជនជាតិអាមេរិក មិនឱ្យដាក់ប្រាក់ទៅក្រុមហ៊ុនដែលជួយកងទ័ពរំដោះប្រជាជនចិន PLA ឱ្យទំនើបកម្ម។ បទបញ្ជានេះ ក៏រារាំងការទិញឬការវិនិយោគនៅក្នុងមូលនិធិទីផ្សារដែលកំពុងរីកចម្រើនដែលរួមមានក្រុមហ៊ុនដែលចាប់ផ្តើមនៅថ្ងៃទី ១១ ខែមករាឆ្នាំ ២០២១ និងផ្តល់ឱ្យក្រុមហ៊ុនរហូតដល់ខែវិច្ឆិកាឆ្នាំ ២០២១ ដើម្បីដកខ្លួនចេញពីពួកគេ (PLA) ។

យោងតាមសារព័ត៌មាន Wall Street Journal មានក្រុមហ៊ុនចំនួន ៣១ នៅក្នុងបញ្ជី។ សារព័ត៌មាន Bloomberg បានចុះផ្សាយបញ្ជីផ្នែកមួយដែលរួមមានក្រុមហ៊ុនចំនួន ២០ នៅក្នុងខែមិថុនាដែលរួមមានក្រុមហ៊ុនរចនាលំហអាកាស, ក្រុមហ៊ុនសាងសង់នាវា និងក្រុមហ៊ុនសាងសង់ផ្សេងទៀត ក៏ដូចជាក្រុមហ៊ុនបច្ចេកវិទ្យាដូចជាក្រុមហ៊ុន China Mobile Ltd និងសាជីវកម្មទូរគមនាគមន៍ចិន។

នៅក្នុងបទបញ្ជានោះ លោក ដូណាល់ ត្រាំ អះអាងថាសាធារណរដ្ឋប្រជាមានិតចិន “កំពុងកេងប្រវ័ញ្ចដើមទុន របស់សហរដ្ឋអាមេរិកកាន់តែច្រើនឡើង ៗ ដើម្បីជាធនធាន និងជួយដល់ការអភិវឌ្ឍ និងការធ្វើទំនើបកម្មយោធា ចារកម្ម និងការចាត់វិធានការសន្តិសុខ ផ្សេងទៀត ដែលនៅតែបន្តអនុញ្ញាតឱ្យ PRC គំរាមកំហែងដោយផ្ទាល់ ដល់សហរដ្ឋអាមេរិក ៕

ប្រែសម្រួលៈ ណៃ តុលា