បរទេស៖ ប្រទេសចិន នៅថ្ងៃចន្ទនេះ បាននិយាយប្រាប់ថា ខ្លួនប្រឆាំងដាច់ខាត និងថ្កោលទោសយ៉ាងខ្លាំងក្លា ចំពោះការជ្រៀតជ្រែករបស់សហរដ្ឋអាមេរិក ក្នុងកិច្ចការក្នុងស្រុករបស់ខ្លួន ប្រសិនបើសេចក្តីរាយការណ៍ របស់ប្រព័ន្ធផ្សព្វផ្សាយមួយ ដែលថា ទីក្រុងវ៉ាស៊ីនតោន កំពុងតែត្រៀមរៀបចំទណ្ឌកម្មថ្មីលើមន្ត្រីចិន ជុំវិញប្រតិបត្តិការបង្រ្កាបនៅហុងកុងនោះ គឺជាការពិត។
មន្ត្រីនំាពាក្យក្រសួងការបរទេសចិន លោកស្រី Hua Chunying បាននិយាយប្រាប់សន្និសីទកាសែតមួយថា ប្រសិនបើសហរដ្ឋអាមេរិក នៅតែទទូចដើរលើផ្លូវខុសនោះ ប្រទេសចិននឹងបន្តចាត់វិធានការ ប្រឆាំងយ៉ាងម៉ឺងម៉ាត់ ដើម្បីការពារអធិបតេយ្យភាព និងសន្តិសុខរបស់ខ្លួន។
គួរបញ្ជាក់ថា នៅថ្ងៃចន្ទនេះ មានសេចក្តីរាយការណ៍ មួយចំនួនបាននិយាយថា សហរដ្ឋអាមេរិក កំពុងតែត្រៀមរៀបចំ ធ្វើការដាក់ទណ្ឌកម្ម លើមន្ត្រីចិនជាច្រើនរូប ជុំវិញតួនាទីរបស់ពួកគេ ក្នុងរឿងដែលទីក្រុងប៉េកាំង ដកសិទ្ធិរបស់សមាជិកសភាមក ពីបក្សប្រឆាំងនៅទីក្រុងហុងកុង ៕
ប្រែសម្រួល៖ ប៉ាង កុង
