បរទេស៖ ប្រទេសចិន នៅថ្ងៃពុធនេះ បាននិយាយថា ខ្លួនគាំទ្រចំពោះអាជ្ញាធរហុងកុង ក្នុងការបំពេញនូវភារកិច្ចរបស់ពួកគេ ក្រោយប៉ូលីសទីក្រុងហុងកុង បានចាប់ខ្លួនមនុស្សចំនួន ៥៣នាក់ ក្នុងប្រតិបត្តិការបង្ក្រាបពួកសកម្មជនគាំទ្រ លទ្ធិប្រជាធិបតេយ្យ។
មន្ត្រីនាំពាក្យរបស់ក្រសួងការបរទេស នៃប្រទេសចិន លោកស្រី Hua Chunying តាមសេចក្តីរាយការណ៍ បាននិយាយប្រាប់សន្និសីទកាសែតប្រក្រតីមួយថា យោងទៅតាមផ្លូវច្បាប់នោះ សិទ្ធិនិងសេរីភាពរបស់ប្រជាជន របស់ទីក្រុងហុងកុង គឺមិនត្រូវបានប៉ះពាល់នោះទេ។
នៅថ្ងៃពុធនេះ ប៉ូលីសហុងកុង បាននិយាយប្រាប់ថា មនុស្សចំនួន៥៣នាក់ ត្រូវបានចាប់ខ្លួននៅក្នុង ប្រតិបត្តិការបង្ក្រាបពួកសកម្មជនគាំទ្រលទ្ធិប្រជាធិបតេយ្យ ដែលពាក់ព័ន្ធនឹងមន្ត្រីសន្តិសុខជាតិចំនួនប្រហែល ១.០០០នាក់ ហើយនោះគឺជាការបង្ក្រាបដ៏ធំបំផុត លើជំរុំក្រុមប្រឆាំងហុងកុង៕
ប្រែសម្រួល៖ ប៉ាង កុង
