បរទេស៖រដ្ឋបាលលោក បៃដិន នៅពេលថ្មីៗនេះ បាននិយាយថា ខ្លួនបានដកអាជ្ញាប័ណ្ណពិសេស ដែលអតីតរដ្ឋបាលលោក ត្រាំ ផ្តល់ឲ្យដល់អ្នកជំនួញអន្តរជាតិ គឺលោក Dan Gertler ដោយដកចេញពីទណ្ឌកម្មអាមេរិក និងបាននិយាយថា ការចូលរួមរបស់លោក ក្នុងអំពើពុករលួយនៅសាធារណរដ្ឋប្រជាធិបតេយ្យកុងហ្គោ មិនត្រូវគ្នានឹងគុណតម្លៃអាមេរិក។
លោក Dan Gertler ជាមហាសេដ្ឋីរ៉ែអ៊ីស្រាអែល បានទទួលស្ងាត់ៗនូវអាជ្ញាប័ណ្ណពិសេសមួយពីរដ្ឋបាលលោក ត្រាំ ឲ្យដកលោកចេញពីទណ្ឌកម្មដែលបានដាក់លើរូបលោក នៅក្នុងឆ្នាំ២០១៧និង២០១៨ ក្រោមច្បាប់គណនេយ្យភាពសិទ្ធិមនុស្សសកល។
លោក Brad Brooks-Rubin ជាទីប្រឹក្សាទូទៅនៅក្រុមស៊ើបអង្កេត The Sentry បាននិយាយដូច្នេះថា “ទណ្ឌកម្មនិងសម្ពាធហិរញ្ញវត្ថុកាន់តែខ្លាំង ចាំបាច់ត្រូវតែអនុវត្ត ក្នុងទម្រង់ស្របគ្នា ដើម្បីជំរុញបង្កើនទំនុកចិត្តនៃស្ថាប័នហរិញ្ញវត្ថុនិងសម្ពន្ធមិត្តរបស់យើង ដែលរង់ផលប៉ះពាល់ដោយសារតែអាជ្ញាប័ណ្ណនេះ”។
ចំណែកលោក Ned Price ជាមន្ត្រីនាំពាក្យក្រសួងការបរទេសអាមេរិក បាននិយាយថា អាជ្ញាប័ណ្ណត្រូវបានដកចេញ ដោយសារតែវាមិនស្របគ្នានឹងចំណាប់អារម្មណ៍គោលនយោបាយបរទេសដ៏ខ្លាំងក្លារបស់អាមេរិក ក្នុងដំណើរប្រយុទ្ធប្រឆាំងអំពើពុករលួយនៅជុំវិញពិភពលោក ជាពិសេសរួមបញ្ចូលទាំងកិច្ចប្រឹងប្រែងរបស់អាមេរិក ក្នុងការទប់ស្កាត់អំពើពុករលួយនិងលើកកម្ពស់ស្ថិរភាពនៅសាធារណរដ្ឋប្រជាធិបតេយ្យកុងហ្គោ”៕ ប្រែសម្រួល៖ប៉ាង កុង
