ញូវដេលី ៖ តួលេខចុងក្រោយបង្អស់ របស់ប្រទេសឥណ្ឌា បានឈានដល់ ១១,៧៨៧,៥៣៤ករណី ហើយគិតត្រឹមថ្ងៃព្រហស្បតិ៍នេះ ខណៈដែលមានករណីថ្មីចំនួន ៥៣,៤៧៦ ករណីនៅទូទាំងប្រទេស ដែលជាចំនួនខ្ពស់បំផុត នៅឆ្នាំនេះ ត្រឹមរយៈពេល ២៤ម៉ោងប៉ុណ្ណោះ។
យោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ បានឲ្យដឹងថា ទន្ទឹមនឹងនេះដែរ ការស្លាប់ចំនួន ២៥១នាក់បន្ថែមទៀត ចាប់តាំងពីព្រឹកថ្ងៃពុធនេះ ដោយបានធ្វើឱ្យចំនួនអ្នកស្លាប់ សរុបកើនឡើង រហូតដល់ ១៦០,៦៩២ នាក់។
ទោះជាយ៉ាងណា នៅតែមានករណីសកម្មចំនួន ៣៩៥,១៩២ករណី នៅក្នុងប្រទេសនេះ ខណៈមនុស្ស ១១,២៣១,៦៥០ នាក់ត្រូវបានអនុញ្ញាត ឲ្យចាកចេញពីមន្ទីរពេទ្យ បន្ទាប់ពីទទួលការព្យាបាលជាសះស្បើយ។
នៅក្នុងនោះដែរ មានការកើនឡើងចំនួន ២៦,៧៣៥ ករណី ដែលសកម្មក្នុងអំឡុងពេល ២៤ ម៉ោងមុន ដែលក្នុងនោះចំនួនករណីអតិបរមា ១៦,៦៦២ ត្រូវបានរាយការណ៍ពីរដ្ឋ Maharashtra ភាគនិរតីប្រទេស។
ក្នុងខែមករាចំនួនករណីប្រចាំថ្ងៃ នៅក្នុងប្រទេសបានធ្លាក់ ចុះដល់ក្រោម ១០,០០០នាក់ ។ ប្រជាជនជាង ៥៣ លាននាក់ត្រូវបានចាក់វ៉ាក់សាំង ប្រឆាំងនឹងជំងឺកូវីដ-១៩ នៅប្រទេសឥណ្ឌា ចាប់តាំងពីការជំរុញកាត ធ្វើតេស្ដទូទាំងប្រទេស បានចាប់ផ្តើមនៅថ្ងៃទី១៦ ខែមករា។
ទិន្នន័យចុងក្រោយ ដែលចេញដោយក្រុមប្រឹក្សាស្រាវជ្រាវ ផ្នែកវិទ្យាសាស្ត្រឥណ្ឌា (ICMR) បានឱ្យដឹងនៅថ្ងៃព្រហស្បតិ៍នេះថា ទន្ទឹមនឹងនេះការធ្វើតេស្តចំនួន ២៣៧,៥០៣,៨៨២ ត្រូវបានធ្វើឡើងនៅក្នុងប្រទេស រហូតដល់ថ្ងៃពុធ ក្នុងនោះការធ្វើតេស្តចំនួន ១,០៦៥,០២១ ត្រូវបានធ្វើឡើង នៅថ្ងៃពុធតែមួយ ៕
ដោយ ឈូក បូរ៉ា
