បរទេស៖ រដ្ឋាភិបាលជប៉ុន បានឱ្យដឹងកាលពីថ្ងៃពុធថា ខ្លួននឹងរារាំងការធ្វើដំណើរ របស់អ្នកទេសចរបរទេសទាំងអស់ ដែលបានមកលេងប្រទេសថៃ និងប្រទេសចំនួន ៦ ផ្សេងទៀត ក្នុងគោលបំណង ដើម្បីទប់ស្កាត់ការរីករាលដាល នៃវីរុសកូវីដ១៩។
យោងតាមសារព័ត៌មាន Bangkok Post ចេញផ្សាយនៅថ្ងៃទី១៩ ខែឧសភា ឆ្នាំ២០២១ បានឱ្យដឹងថា វិធានការនេះនឹងមានប្រសិទ្ធិភាព ចាប់ពីថ្ងៃសុក្រ។ ក្រៅពីប្រទេសថៃហើយ នៅមានប្រទេសទាំង ៦ ផ្សេងទៀត គឺប្រទេសកម្ពុជា ស្រីលង្កា សីស្ហែល សាំងលូស៊ី ទីម័រខាងកើត និង ប្រទេស ម៉ុងហ្គោលី ដែលនាំយកចំនួនប្រទេស និងតំបន់ក្រោមការរឹតត្បិតបែបនេះ ចូលប្រទេសជប៉ុនដល់ ១៥៩ ប្រទេស។
អ្នកដំណើរបរទេស ដែលបានទៅតំបន់ ទាំងនោះ ក្នុងរយៈពេល ១៤ ថ្ងៃនៃការមកដល់នឹង មិនត្រូវបានអនុញ្ញាត ឱ្យចូលក្នុងប្រទេសជប៉ុនទេ លើកលែង តែក្នុងកាលៈទេសៈពិសេស ចំណែក ជនជាតិជប៉ុន មិនត្រូវហាមឃាត់នោះទេ៕
ប្រែសម្រួលៈ ណៃ តុលា
