ប្រធានាធិបតី និងនាយករដ្ឋមន្ត្រីប្រទេសម៉ាលី ត្រូវយោធាដោះលែង ក្រោយលាឈប់ពីតំណែង

បរទេស៖ជំនួយការអនុប្រធានាធិបតី នៃប្រទេសម៉ាលីមួយរូប តាមសេចក្តីរាយការណ៍ បាននិយាយប្រាប់នៅថ្ងៃព្រហស្បតិ៍នេះថា ប្រធានាធិបតីនិងនាយករដ្ឋមន្ត្រីបណ្ដោះអាសន្នម៉ាលី ទើបត្រូវបានដោះលែងវិញ បន្ទាប់ពីត្រូវពួកយោធាឃុំខ្លួន និងក្រោយមក បានលាឈប់ពីតំណែង។

លោកប្រធានាធិបតី Bah Ndaw និងលោកនាយករដ្ឋមន្ត្រី Moctar Ouane គឺត្រូវបានចាប់ខ្លួននិងបញ្ជូនទៅមូលដ្ឋានយោធាមួយកន្លែង នៅខាងក្រៅរដ្ឋធានី កាលពីថ្ងៃចន្ទ បង្កឲ្យមានវិបត្តិនៅក្នុងប្រទេសអាហ្វ្រិកខាងលិចមួយនេះ និងបង្កឲ្យមានការគម្រាមកំហែង ដាក់ទណ្ឌកម្មពីបណ្ដាមហាអំណាចនានា។

យោងតាមសេចក្តីរាយការណ៍មួយ ចេញផ្សាយដោយទីភ្នាក់ងារសារព័ត៌មាន Us News នៅថ្ងៃទី២៧ ខែឧសភា ឆ្នាំ២០២១ បានឲ្យដឹងថា មន្ត្រីជាន់ខ្ពស់ទាំងពីររូបនេះ បានធ្វើការលាឈប់ពីតំណែង ក្នុងពេលជាប់ឃុំនោះ កាលពីថ្ងៃពុធ។

ការចាប់ខ្លួននោះ ដែលត្រូវបានរៀបចំឡើងដោយអនុប្រធានាធិបតី លោក Assimi Goita នោះ បានធ្វើឲ្យប៉ះពាល់ដល់ដំណើរវិលត្រឡប់ មករកលទ្ធិប្រជាធិបតេយ្យរបស់ប្រទេសម៉ាលី ក្រោយរដ្ឋប្រហារក្នុងខែសីហា ផ្តួលរំលំអតីតប្រធានាធិបតី លោក Ibrahim Boubacar Keita៕ប្រែសម្រួល៖ប៉ាង កុង