រ៉ង់ហ្គូន៖ ប្រព័ន្ធផ្សព្វផ្សាយរដ្ឋបាន រាយការណ៍ថាតុលាការយោធាមីយ៉ាន់ម៉ា បានកាត់ទោសមនុស្ស ២៨ នាក់ឱ្យជាប់ពន្ធនាគាររយៈពេល ២០ ឆ្នាំពីបទដុតបំផ្លាញរោងចក្រចំនួនពីរ បន្ទាប់ពីរោងចក្រជាច្រើនដែល ផ្តល់ហិរញ្ញប្បទានដោយចិន ត្រូវបានដុតបំផ្លាញអំឡុង ពេលមានចលាចលនៅក្នុងទីក្រុងយ៉ាំងហ្គោន កាលពីខែមីនា។
សារព័ត៌មានយោធាមីយ៉ាន់ម៉ា Myawady ដែលគ្រប់គ្រងដោយកងទ័ពបានចុះផ្សាយថា ក្រុមជនល្មើសបានកំណត់គោលដៅរោងចក្រស្បែកជើង និងរោងចក្រកាត់ដេរមួយនៅជាយក្រុង Hlaing Tharyar នៃទីក្រុងធំបំផុតរបស់ប្រទេសមីយ៉ាន់ម៉ា។
ប្រព័ន្ធផ្សព្វផ្សាយ និងក្រុមសកម្មជនមួយបានឲ្យដឹងថា ច្បាប់យុទ្ធគុនត្រូវបានដាក់នៅជាយក្រុង បន្ទាប់ពីមានអគ្គិភ័យជាច្រើនដោយមនុស្សរាប់សិប នាក់បានស្លាប់ ឬរងរបួសនៅពេលដែលកម្លាំងសន្តិសុខបានបាញ់ ទៅលើក្រុមអ្នកតវ៉ាប្រឆាំងនឹងយោធា។
ស្ថានទូតចិនប្រចាំនៅមីយ៉ាន់ម៉ា បានឲ្យដឹងនៅពេលនោះថា បុគ្គលិកចិនជាច្រើននាក់ បានរងរបួស និងជាប់នៅក្នុងការវាយប្រហារ ដែលបានដុតបំផ្លាញ ហើយបានអំពាវនាវឱ្យមីយ៉ាន់ម៉ាការពារទ្រព្យសម្បត្តិ និងពលរដ្ឋចិន។
កាសែតដែលគ្រប់គ្រង ដោយរដ្ឋរបស់ចិន បានចុះផ្សាយកាលពីខែមីនាថា រោងចក្រដែលវិនិយោគដោយចិន ចំនួន ៣២ ត្រូវបានបំផ្លាញនៅក្នុងការវាយ ប្រហារដោយការខាតបង់ទ្រព្យសម្បត្តិឈានដល់ ២៤០ លានយ័ន (៣៦,៩ លានដុល្លារ) ។
គួរបញ្ជាក់ថា ប្រទេសចិន ត្រូវបានគេមើលឃើញថា កំពុងគាំទ្ររបបយោធាមីយ៉ាន់ម៉ា ដែលបានផ្តួលរំលំរដ្ឋាភិបាលជាប់ឆ្នោតរបស់លោកស្រីអ៊ុងសាន ស៊ូជី កាលពីថ្ងៃទី០១ ខែកុម្ភៈ៕ដោយ ឈូក បូរ៉ា
