ព័ត៌មានអន្តរជាតិ

អគ្គីភ័យទ្រង់ទ្រាយធំ ឆាបឆេះរោងចក្រចម្រាញ់ ប្រេងមួយកន្លែងនៅអ៊ីរ៉ង់

តេហរ៉ង់៖ ទីភ្នាក់ងារព័ត៌មានចិនស៊ិនហួ បានចុះផ្សាយនៅថ្ងៃទី៣ ខែមិថុនា ឆ្នាំ២០២១ថា ប្រព័ន្ធផ្សព្វផ្សាយព័ត៌មានក្នុងស្រុក បានរាយការណ៍ថា អគ្គីភ័យទ្រង់ទ្រាយធំមួយបានឆាបឆេះ នៅក្នុងរោងចក្រចម្រាញ់ប្រេង Shahid Tondguyan នៅភាគខាងត្បូងរដ្ឋធានី តេហរ៉ង់ ប្រទេសអ៊ីរ៉ង់ កាលពីល្ងាចថ្ងៃពុធ ។

លោក Masour Darajati នាយកគ្រប់គ្រងវិបត្តិនៅតេហរ៉ង់ បានប្រាប់ដល់ទូរទស្សន៍រដ្ឋថា “ខ្សែបញ្ជូនឧស្ម័នមួយក្នុងចំណោម ខ្សែបញ្ជូនឧស្ម័នរាវ នៅក្នុងរោងចក្រចម្រាញ់ប្រេង តេហរ៉ង់ បានខូច ប៉ុន្តែ មិនបានបង្កហានិភ័យធ្ងន់ធ្ងរនោះទេ” ។

លោក Darajati បានលើកឡើងថា ក្រុមអ្នកពន្លត់អគ្គីភ័យ បានទៅដល់កន្លែងកើតហេតុ ដើម្បីពន្លត់ភ្លើងដែលបានឆាបឆេះ ។

មជ្ឈមណ្ឌលសង្គ្រោះបន្ទាន់ នៃក្រុងតេហរ៉ង់ បានប្រកាសថា មិនមាននរណាម្នាក់រងរបួស នៅក្នុងឧប្បត្តិហេតុនេះនោះទេ ។

ទន្ទឹមនឹងនេះដែរ រោងចក្រចម្រាញ់ប្រេង Shahid Tondguyan បានបញ្ឈប់រាល់សកម្មភាពនានា នៅក្នុងរោងចក្រចម្រាញ់ប្រេង ។ ទីភ្នាក់ងារព័ត៌មានកម្មករអ៊ីរ៉ង់ ហៅកាត់ ILNA បានរាយការណ៍ឲ្យដឹង ។

ប្រព័ន្ធផ្សព្វផ្សាយព័ត៌មានក្នុងស្រុក បានបោះពុម្ពរូបភាពនានា ដែលបង្ហាញអំពីផ្សេងខ្មៅដ៏ក្រាស់ ភាយចេញពីអណ្តាតភ្លើង ដែលអាចមើលឃើញពី ផ្នែកផ្សេងទៀតនៃទីក្រុងនេះ ៕

ប្រែសម្រួលដោយ៖ ម៉ៅ បុប្ផាមករា

បំរាម៖ ហាមយកព័ត៌មានរបស់សារព័ត៌មាន ដើមអម្ពិល ចុះផ្សាយដោយគ្មានការជូនដំណឹងមកជាមុន។ រាល់បញ្ហាអត្ថបទដែលយកចុះផ្សាយបន្ត ស្ថាប័នយើងខ្ញុំមិនទទួលខុសត្រូវឡើយ។ លោកអ្នកអាចទំនាក់ំទំនងមកក្រុមការងារតាមរយៈ​ទូរស័ព្ទលេខ៖ 012 722337 ឬ dapnews@gmail.com

All rights reserved by: DAP News

To Top