បរទេស៖ប្រធានាធិបតីកូរ៉េខាងត្បូង លោក មូន ជេអ៊ីន នៅពេលថ្មីៗនេះ បានមានប្រសាសន៍ថា ទីក្រុងសេអ៊ូល នឹងព្យាយាមធ្វើការផ្គត់ផ្គង់ ថ្នាំវ៉ាក់សំាងកូវីដ១៩ ឲ្យទៅប្រទេសកូរ៉េខាងជើង ប្រសិនបើកូរ៉េខាងត្បូងបានក្លាយជា មជ្ឈមណ្ឌលថ្នាំវ៉ាក់សាំង ពិភពលោកមួយ។
កាសែតកូរ៉េ Maeil Business បានរាយាការណ៍ថា លោក មូន ជេអ៊ីន ដែលជាមដឹកនាំកូរ៉េខាងត្បូងដំបូងគេដែលធ្វើទស្សនកិច្ចប្រទេសអូទ្រីស បានមានប្រសាសន៍នៅក្នុងសហសន្និសីទកាសែតមួយ ជាមួយលោកប្រធានាធិបតី Alexander Van der Bellen ថា ប្រទេសកូរ៉េខាងត្បូង ជាបឋមនឹងចាំបាច់ត្រូវការការអនុញ្ញាត របស់កូរ៉េខាងជើង មុននឹងថ្នាំវ៉ាក់សាំង ត្រូវបញ្ជូនទៅឲ្យ។
យោងតាមសេចក្តីរាយការណ៍មួយ ចេញផ្សាយដោយទីភ្នាក់ងារសារព័ត៌មាន UPI នៅថ្ងៃទី១៥ ខែមិថុនា ឆ្នាំ២០២១ បានឲ្យដឹងថា លោកប្រធានាធិបតីកូរ៉េខាងត្បូង បានមានប្រសាសន៍យ៉ាងដូច្នេះថា “ប្រសិនបើប្រទេសកូរ៉េខាងជើងយល់ព្រមនោះ យើងនឹងលើកកម្ពស់យ៉ាងសកម្ម នូវសហប្រតិបត្តិការ ក្នុងដំណើរផ្គត់ផ្គត់ថ្នាំវ៉ាក់សាំង”។
លោកបានមានប្រសាសន៍បន្តថា ប្រសិនបើប្រទេសកូរ៉េខាងត្បូង បានក្លាយជាមជ្ឈមណ្ឌលថ្នាំវ៉ាក់សាំងពិភពលោកមួយនោះ ប្រទេសកូរ៉េខាងជើង នឹងក្លាយជាដៃគូមួយដោយឯកឯង សម្រាប់សហប្រតិបត្តិការ៕ប្រែសម្រួល៖ប៉ាង កុង
