វ៉ាស៊ីនតោន ៖ រដ្ឋមន្រ្តីការពារជាតិ សហរដ្ឋអាមេរិក លោក Lloyd Austin បានលើកឡើងថា សហរដ្ឋអាមេរិក នឹងបន្តរក្សាសន្តិភាព នៅលើឧបទ្វីបកូរ៉េ ដោយកាត់បន្ថយការគំរាម កំហែង ពីកូរ៉េខាងជើង តាមរយៈការទូត ដែលនេះជាការអនុវត្ដ គោលនយោបាយដដែលៗ ជាមួយក្រុងព្យុងយ៉ាង បើទោះបីជាដឹងថា នឹងមិនទទួលបាន លទ្ធផលក៏ដោយ ។
រដ្ឋមន្រ្តីការពារជាតិរូបនេះ ក៏បានឲ្យដឹងផងដែរថា ប្រទេសរបស់លោក នឹង នៅតែបន្តផ្តោតលើ ប្រទេសកូរ៉េខាងជើង បើទោះបីជាមានការ គំរាមកំហែងកាន់តែខ្លាំងឡើង ពីប្រទេសដទៃទៀត ដូចជាប្រទេសចិន ក៏ដោយ ។
លោកបានឲ្យដឹង នៅក្នុងសេចក្តីថ្លែងការណ៍ ជាលាយលក្ខណ៍អក្សរ ទៅកាន់ គណៈកម្មាធិការ ប្រដាប់អាវុធថា “ការឈានមុខគេជាមួយការ ទូតសហរដ្ឋអាមេរិក នឹងបន្តធ្វើការដើម្បីកាត់ បន្ថយអស្ថិរភាព និងអាកប្បកិរិយាបង្ក ហេតុរបស់កូរ៉េខាងជើង និងរក្សាសន្តិភាព និងស្ថិរភាពនៅឧបទ្វីបកូរ៉េ”។
លោកបានកត់សម្គាល់ថា ប្រទេសចិន និងរុស្ស៊ី បង្កការគំរាមកំហែង និងបន្ទាន់បំផុត ចំពោះសហរដ្ឋអាមេរិក ប៉ុន្តែកូរ៉េខាងជើង ក៏បង្កការគំរាមកំហែងយ៉ាងធ្ងន់ធ្ងរ ដល់ប្រទេស និងសម្ព័ន្ធមិត្ត របស់ខ្លួនផងដែរ ខណៈពេលដែលព្យាយាមអភិវឌ្ឍ សមត្ថភាពមីស៊ីលផ្លោង របស់ខ្លួនបន្ថែមទៀត ។
រដ្ឋមន្រ្តីការពារជាតិរូបនេះ បានបន្ថែមថា“ យើងក៏ប្រឈមមុខ នឹងបញ្ហាប្រឈមពីប្រទេស កូរ៉េខាងជើង ដែលជាប្រទេសមួយដែលមានមហិច្ឆិតា ដើម្បីមានសមត្ថភាពវាយប្រហារ លើទឹកដីកំណើត របស់សហរដ្ឋអាមេរិក” ។
លោកបានអះអាងថា ការចំណាយលើវិស័យ ការពារជាតិ ដែលបានស្នើឡើងចំនួន ៧១៥ ពាន់លានដុល្លារនឹងជួយប្រឆាំងនឹងការគំរាមកំហែងនានា ដែលបង្កឡើងដោយកូរ៉េខាងជើង និងប្រទេសដទៃទៀត ដូចជាចិន និងរុស្ស៊ី។
លោកបានឲ្យដឹងនៅក្នុងសុន្ទរកថា បើកអង្គប្រជុំថា “ជាមួយនឹងការសង្កត់ធ្ងន់ទៅលើអវកាសការការពារ មីស៊ីល និងឧបករណ៍ចាប់ សញ្ញាទំនើបជាងមុន ថវិការបស់យើងក៏នឹងជួយយើងប្រឆាំង នឹងការកើនឡើងសមត្ថភាពមីស៊ីល ផ្លោងរបស់បណ្តាប្រទេស ដូចជាកូរ៉េខាងជើង និងអ៊ីរ៉ង់ផងដែរ” ៕
ដោយ ឈូក បូរ៉ា
