បរទេស៖ អង្គការនៃប្រទេសនាំចេញប្រេងកាត និងសម្ពន្ធមិត្តផលិតប្រេង ដឹកនាំដោយប្រទេសរុស្ស៊ី កាលពីថ្ងៃអាទិត្យម្សិលមិញនេះ បានព្រមព្រៀងគ្នាក្នុងទីក្រុងឌូបៃ ប្រទេសសហភាពអារ៉ាប់រួម បង្កើនការផលិតប្រេងក្នុងមួយថ្ងៃ ៤០០.០០០បារ៉ែល ក្នុងកិច្ចប្រឹងប្រែងបង្កើនសមត្ថភាពផលិត នៅមុនការរាតត្បាតជម្ងឺកូវីដ១៩ បានចាប់ផ្តើម នៅក្នុងខែមីនា ឆ្នាំ២០២០។
តាមសេចក្តីរាយការណ៍មួយ ពីទីភ្នាក់ងារសារព័ត៌មាន The Wall Street Journal បានឲ្យដឹងថា បណ្ដាប្រទេសអ្នកផលិតប្រេងនានា នឹងបង្កើនការផលិតចាប់ផ្តើមពីខែក្រោយទៅ ហើយបន្តរហូតដល់ផ្នែក នៃចុងឆ្នាំ២០២២ ហើយស្ថានភាពទីផ្សារ នឹងត្រូវបានវាយតម្លៃនៅក្នុងខែធ្នូ។
នៅក្នុងសេចក្តីថ្លែងការណ៍មួយ អង្គការ OPEC+ បាននិយាយប្រាប់យ៉ាងដូច្នេះថា “សន្និសីទបានធ្វើការកត់សម្គាល់ថា តម្រូវការប្រេង កំពុងតែបង្ហាញឲ្យឃើញយ៉ាងច្បាស់ នូវសញ្ញាប្រសើរឡើង និងថា មូលដ្ឋានគ្រឹះទីផ្សារកំពុងតែបន្តរឹងមាំឡើង”។
តាមសេចក្តីរាយការណ៍មួយ ចេញផ្សាយដោយទីភ្នាក់ងារសារព័ត៌មាន UPI នៅថ្ងៃទី១៨ ខែកក្កដា ឆ្នាំ២០២១ បានឲ្យដឹងថា ជាមួយសេដ្ឋកិច្ចមានភាពប្រសើរឡើង តម្លៃប្រេងនាពេលថ្មីៗនេះ មានការកើនឡើង ស្របពេលមានកង្វះខាត និងការពន្យាពេលនៃការផ្គត់ផ្គង់៕
ប្រែសម្រួល៖ ប៉ាង កុង
