បរទេស៖ ប្រទេសវេណេស៊ុយអេឡា នាពេលថ្មីៗនេះ បានចោទប្រកាន់ សហរដ្ឋអាមេរិក ពីបទបំពានដែនអាកាស របស់ខ្លួន ក្នុងអ្វីដែលប្រទេសនេះ និយាយថា ជាការបង្កហេតុជាក់ស្តែង និងបានធ្វើការព្រមានថា ខ្លួននឹងធ្វើការឆ្លើយតប យ៉ាងខ្លាំងក្លា ចំពោះសកម្មភាព ណាមួយ ដែលខ្លួនមើលឃើញថា ជាទង្វើឈ្លានពាន។
យោងតាមសេចក្តី រាយការណ៍មួយ ចេញផ្សាយដោយ ទីភ្នាក់ងារសារព័ត៌មាន France 24 នៅថ្ងៃទី២៤ ខែកក្កដា ឆ្នាំ២០២១ បានឲ្យដឹងថា ហេតុការណ៍នេះ បានកើតមានឡើង ស្របពេលដែលយោធាកូឡំប៊ី និងសហរដ្ឋអាមេរិក ចូលរួមក្នុងសមយុទ្ធ នៅជិតតំបន់ឆ្នេរសមុទ្រ ការ៉ាប៊ីន នៃប្រទេសវេណេស៊ុយអេឡា។
សេចក្តីថ្លែងការណ៍ ក្រសួងការពារជាតិមួយ បាននិយាយប្រាប់ថា ប្រទេសវេណេស៊ុយអេឡា បានរាយការណ៍ថា យន្តហោះដឹកជញ្ជូនធុនធ្ងន់អាមេរិក C-17 មួយគ្រឿង បានហោះឆ្លងចូល ក្នុងដែនអាកាសរបស់ខ្លួន កាលពីល្ងាចថ្ងៃព្រហស្បតិ៍ សម្រាប់រយៈពេល៣នាទី ធ្វើដំណើរបានចម្ងាយប្រហែល១៤ម៉ាយ។
គួរបញ្ជាក់ថា កាលពីថ្ងៃទី១៦ ខែកក្កដា កងទ័ពជើងអាកាសកូឡំប៊ី បានរាយការណ៍ពីសហសមយុទ្ធយោធា ជាមួយសហរដ្ឋអាមេរិក ដោយមានគោលបំណង ធ្វើឲ្យកាន់តែប្រសើរឡើង នូវអន្តរប្រតិបត្តិការ ជាមួយប្រទេសជាសម្ពន្ធមិត្ត៕
ប្រែសម្រួល៖ប៉ាង កុង
