បរទេស៖ សេតវិមាន តាមសេចក្តីរាយការណ៍ បានបង្ហាញផែនការយុទ្ធសាស្ត្រ នៅថ្ងៃព្រហស្បតិ៍ សប្ដាហ៍នេះ ដែលបង្កើតឡើង ដើម្បីគ្រប់គ្រងអន្តោប្រវេសន៍ ខុសច្បាប់ នៅតាមព្រំដែន អាមេរិកនិងម៉ិកស៊ិក និងដោះស្រាយមូលដ្ឋានចម្បង នៃអន្តោប្រវេសន៍ និងកិច្ចការពារ សម្រាប់អ្នកដែលព្យាយាម ធ្វើអន្តោប្រវេសន៍ ចូលមកសហរដ្ឋអាមេរិក។
សេតវិមានបាននិយាយថា យុទ្ធសាស្ត្ររបស់ លោកប្រធានាធិបតី ចូ បៃដិន ចាប់យកវិធីសាស្ត្រ មនុស្សធម៌ និងសន្តិសុខ ដោយធ្វើឲ្យប្រសើរឡើង នូវសហប្រតិបត្តិការក្នុងតំបន់ ពង្រឹកកិច្ចការពារ និងផ្តោតលើច្រកផ្លូវ ស្របច្បាប់ សម្រាប់ការចូលទៅ សហរដ្ឋអាមេរិក។
នៅក្នុងសេចក្តីថ្លែងការណ៍មួយ នាថ្ងៃព្រហស្បតិ៍សប្ដាហ៍នេះ សេតវិមានបាននិយាយយ៉ាងដូច្នេះថា “នៅក្នុងពេលបច្ចុប្បន្ននេះ រដ្ឋបាលលោក បៃដិន និងលោកស្រី ហារីស កំពុងតែចេញនូវយុទ្ធសាស្ត្រ មូលហេតុចម្បង ដែលជាផ្នែកស្នូលនៃកិច្ចប្រឹងប្រែង របស់រដ្ឋបាលយើង បង្កើតប្រព័ន្ធអន្តោប្រវេសន៍ស្មើភាព មានរបៀបនិងប្រកបដោយ មនុស្សធម៌”។
យោងតាមសេដចក្តីរាយការណ៍មួយ ចេញផ្សាយដោយ ទីភ្នាក់ងារសារព័ត៌មាន UPI នៅថ្ងៃទី៣០ ខែកក្កដា ឆ្នាំ២០២១ បានឲ្យដឹងថា សេតវិមានបានបន្តទៀតយ៉ាងដូច្នេះថា “យុទ្ធសាស្ត្រនេះ កំណត់ ធ្វើឲ្យអាទិភាព និងសម្របសម្រួល ចំណាត់ការធ្វើឲ្យប្រសើរឡើងនូវសន្តិសុខ អភិបាលកិច្ច សិទ្ធិមនុស្ស លក្ខខណ្ឌសេដ្ឋកិច្ចនៅក្នុងតំបន់ ហើយវាបញ្ចូលនូវឧបករណ៍រដ្ឋាភិបាលផ្សេងៗ ដែលរួមមានទាំង លទ្ធិប្រជាធិបតេយ្យ ជំនួយបរទេស កិច្ចការការទូតសាធារណៈ និងទណ្ឌកម្ម”៕
ប្រែសម្រួល៖ប៉ាង កុង
