បរទេស ៖ មេបញ្ជាការកងកំលាំង ការពារជាតិ របស់ប្រទេសថៃ គឺឧត្តមសេនីយ៍ Chalermpol Srisawat បានចេញសេចក្តីប្រកាសមួយ ក្រោមក្រឹត្យគ្រាអាសន្ន ដែលហាមឃាត់ការជួបជុំ ដែលអាចមានការរីករាល ដាលជំងឺកូវីដ -១៩។
យោងតាមសារព័ត៌មាន Bangkok Post ចេញផ្សាយនៅថ្ងៃទី៥ ខែសីហា ឆ្នាំ២០២១ បានឱ្យដឹងថា ការប្រកាសហាមឃាត់ការប្រមូលផ្តុំនេះ កើតឡើងនៅពេល ដែលបាតុកម្មខាងនយោបាយ បានកើនឡើងនាពេលថ្មីៗនេះ ជាមួយនឹងគម្រោងថ្មីមួយ ដែលគ្រោងធ្វើនៅថ្ងៃសៅរ៍ ដោយក្រុមយុវជនសេរី ប្រឆាំងរដ្ឋាភិបាល ។
ក្រុមនេះបាននិយាយថា ការប្រមូលផ្តុំគ្នានឹងធ្វើនៅវិមាន ប្រជាធិបតេយ្យនៅលើមហាវិថី Ratchadamnoen ហើយក្រុមបាតុករនឹង បន្តទៅកាន់ព្រះបរមរាជវាំង ។
ការហាមប្រាមនេះ ត្រូវបានចេញផ្សាយ នៅក្នុងកាសែត Royal Gazette កាលពីថ្ងៃអង្គារ និងត្រូវបានចុះហត្ថលេខា ដោយឧត្តមសេនីយ៍ Chalermpol ក្នុងតួនាទីជាអ្នកទទួលខុសត្រូវ ក្នុងការដោះស្រាយបញ្ហាគ្រាអាសន្ន ទាក់ទងនឹងសន្តិសុខ។
ការហាមឃាត់នេះត្រូវបានចេញតាមផ្នែកទី ៩ នៃក្រឹត្យគ្រាមានអាសន្ន។ យោងតាមសេចក្តីប្រកាស ការរាតត្បាតជំងឺកូវីដ -១៩ មិនបង្ហាញពីសញ្ញា នៃការធ្លាក់ចុះជាមួយ នឹងការលេចចេញនូវវីរុស ដែលបំលែងខ្លួនថ្មីនៃវីរុស ដែលរីករាលដាលយ៉ាងលឿន បណ្តាលឱ្យចំនួនអ្នកឆ្លង ប្រចាំថ្ងៃកើនឡើង ៕ប្រែសម្រួលៈ ណៃ តុលា
