ប៉ារីស៖ លោក Jean-Yves Le Drian រដ្ឋមន្រ្តីបារាំងប្រចាំទ្វីបអឺរ៉ុប និងកិច្ចការបរទេស បានហៅការផ្លាស់ប្តូរត្រីភាគីរវាងអាមេរិក អង់គ្លេស និងអូស្រ្ដាលីថាជា“ ការចាក់ចំពីក្រោយខ្នង” នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
លោកបានលើកឡើងថា“ យើងបានបង្កើតទំនាក់ទំនងជឿទុកចិត្តជាមួយអូស្ត្រាលី ប៉ុន្ដែការទុកចិត្តនេះត្រូវបានគេក្បត់” ក្នុងនោះក៏បានរិះគន់ការសម្រេចជាឯកតោភាគីរបស់អាមេរិក ជុំវិញកិច្ចព្រមព្រៀងនាវាមុជទឹកដើរដោយថាមពលនុយក្លេអ៊ែរជាមួយអូស្រ្ដាលីផងដែរ។
នៅក្នុងនោះដែរ ប្រទេសបារាំង បានសម្រេចចិត្តកោះហៅឯកអគ្គរដ្ឋទូតរបស់ខ្លួនប្រចាំនៅសហរដ្ឋអាមេរិកនិងអូស្ត្រាលី ដើម្បីទទួលបានការពិគ្រោះយោបល់បន្ទាប់ពីទីក្រុងកង់បេរ៉ា បានលុបចោលកិច្ចព្រមព្រៀងមួយ ដើម្បីទិញនាវាមុជទឹក ដែលរចនាឡើងដោយបារាំង ហើយបានសម្រេចចិត្តវិនិយោគលើនាវាមុជទឹកដើរដោយថាមពលនុយក្លេអ៊ែររបស់អាមេរិក។
រដ្ឋមន្រ្តីបារាំងប្រចាំទ្វីបអឺរ៉ុប និងកិច្ចការបរទេសលោក Jean-Yves Le Drian បានឲ្យដឹងនៅក្នុងសេចក្តីថ្លែងការណ៍មួយនៅថ្ងៃសុក្រនេះថា តាមសំណើរបស់ប្រធានាធិបតីនៃសាធារណរដ្ឋ ខ្ញុំបានសម្រេចចិត្តកោះហៅឯកអគ្គរដ្ឋទូត មកទីក្រុងប៉ារីស វិញភ្លាមៗដើម្បីពិគ្រោះយោបល់ជាមួយឯកអគ្គរដ្ឋទូតយើងទាំងពីរ នៅសហរដ្ឋអាមេរិក និងអូស្ត្រាលី។
នេះគឺជាលើកទីមួយក្នុងប្រវត្តិសាស្ត្របារាំង ដែលការសម្រេចចិត្តបែបនេះត្រូវបានធ្វើឡើងតាមប្រទេសទាំងពីរ នេះបើយោងតាមប្រព័ន្ធផ្សព្វផ្សាយបារាំង។
នៅព្រឹកថ្ងៃនេះរដ្ឋមន្រ្តីក្រសួងការបរទេសទទួលបន្ទុកកិច្ចការអ៊ឺរ៉ុបលោកស្រី Clement Beaune បានលើកឡើងថា បារាំង មិនអាចជឿទុកចិត្តលើអូស្រ្តាលី ក្នុងកិច្ចចរចាពាណិជ្ជកម្ម ដែលកំពុងបន្តជាមួយសហភាពអឺរ៉ុប (EU) បន្ទាប់ពីភាពជាដៃគូសន្តិសុខថ្មី ដែលមានឈ្មោះថា“ AUKUS” (អូស្ត្រាលី-អង់គ្លេស-អាមេរិក) ត្រូវបានបង្ហាញដោយប្រទេសទាំង៣ កាលពីថ្ងៃពុធកន្លងទៅ។
គំនិតផ្តួចផ្តើមដំបូងក្រោមភាពជាដៃគូត្រីភាគី នឹងត្រូវបញ្ជូនកងនាវាមុជទឹកដើរដោយថាមពលនុយក្លេអ៊ែរទៅអូស្រ្តាលី ដោយសហរដ្ឋអាមេរិក និងចក្រភពអង់គ្លេស ខណៈកាលពីឆ្នាំ ២០១៦ អូស្ត្រាលី បានចុះកិច្ចសន្យាជាមួយបារាំង សម្រាប់ការទិញនាវាមុជទឹកប្រើម៉ាស៊ូត-អគ្គិសនីធម្មតាចំនួន ១២ គ្រឿង។
លោកបានបន្ថែមថា“ អាកប្បកិរិយារបស់អាមេរិកធ្វើឱ្យខ្ញុំព្រួយបារម្ភ ការសម្រេចចិត្តឯកតោភាគី និងឃោរឃៅនេះ គឺស្រដៀងនឹងអ្វីដែលលោក ដូណាល់ ត្រាំ បានធ្វើក្នុងអាណត្ដិរបស់លោក”៕
ដោយ ឈូក បូរ៉ា
