តូក្យូ៖ រដ្ឋាភិបាលជប៉ុន បានឲ្យដឹងថា ប្រទេសកូរ៉េខាងជើង នៅព្រឹកថ្ងៃអង្គារបានបាញ់អ្វី ដែលមើលទៅដូចជាមីស៊ីលផ្លោង នៅក្នុងការបាញ់បង្ហោះលើកទី២ ក្នុងខែនេះ នេះបើយោងតាមការចុះផ្សាយ របស់ទីភ្នាក់ងារ សារព័ត៌មានចិនស៊ិនហួ។
យោធាកូរ៉េខាងត្បូង បានឲ្យដឹងថា កូរ៉េខាងជើងបានបាញ់ មីស៊ីលផ្លោងមួយគ្រាប់ មិនស្គាល់អត្តសញ្ញាណ ចូលទៅក្នុងសមុទ្រនៅ ឆ្នេរសមុទ្រខាងកើតរបស់ខ្លួន។
ការបាញ់បង្ហោះនេះ បានកើតឡើងបន្ទាប់ពីប្រទេសកូរ៉េខាងជើង បានបាញ់មីស៊ីលផ្លោងចំនួន ២គ្រាប់ចូលទៅក្នុងដែនទឹក ក្នុងតំបន់សេដ្ឋកិច្ចផ្តាច់មុខ របស់ប្រទេសជប៉ុន នៅថ្ងៃទី១៥ ខែកញ្ញាក្នុងការសាកល្បងដំបូងនៃ ការបាញ់អាវុធបែបនេះ ក្នុងរយៈពេលជិត ៦ ខែ។
យោងតាមការវិភាគ របស់ប្រទេសជប៉ុន មីស៊ីលទាំងពីរគ្រាប់បានឡើង ដល់កម្ពស់ប្រហែល ៥០ គីឡូម៉ែត្រ ហើយហោះបានចម្ងាយប្រហែល ៧៥០ គីឡូម៉ែត្រមុនពេលធ្លាក់ចូល ក្នុងទឹកចេញពីឧបទ្វីបណូតូ។
ការចាប់ផ្តើមរបស់ពួកគេ បានធ្វើឱ្យមានការភ្ញាក់ផ្អើល ជាថ្មីនៅក្នុងប្រទេសជប៉ុន ខណៈដែលខ្លួនកំពុងត្រៀមខ្លួន ដើម្បីឃើញរដ្ឋាភិបាលថ្មីបន្ទាប់ពី ការបោះឆ្នោតជ្រើសរើសមេដឹកនាំ គណបក្សកាន់អំណាចធំបំផុត របស់ខ្លួននៅថ្ងៃពុធនេះ។
ប្រទេសកូរ៉េខាងជើង បានឲ្យដឹងថា ការបាញ់បង្ហោះនៅថ្ងៃទី១៥ ខែកញ្ញា គឺជាការសាកល្បង“ ប្រព័ន្ធមីស៊ីល ផ្លូវដែក” ហើយគោលបំណង គឺដើម្បីវាយប្រហារ តំបន់គោលដៅចម្ងាយ ៨០០ គីឡូម៉ែត្រពីឆ្នេរសមុទ្រខាងកើតរបស់ខ្លួន ៕
ដោយ ឈូក បូរ៉ា
