ដូហា ៖ ក្រុមតាលីបង់ បានធ្វើកិច្ចចរចាទល់មុខគ្នា ជាលើកដំបូង ជាមួយគណៈប្រតិភូអាមេរិក-សហភាពអឺរ៉ុប នៅទីក្រុងដូហា ប្រទេសកាតា ខណៈទីក្រុងព្រុចសែល បានសន្យាផ្តល់ជំនួយចំនួន ១ ពាន់លានអឺរ៉ូ (១,២ ពាន់លានដុល្លារ) ដល់អាហ្វហ្គានីស្ថាន ។
នៅឯកិច្ចប្រជុំដូហា និងសន្និសីទ នៃប្រទេសសេដ្ឋកិច្ចធំៗ របស់ពិភពលោក G20 សារសម្រាប់ ពួកតាលីបង់ គឺដូចគ្នា ៖ ពិភពលោកប្តេជ្ញា ផ្តល់ជំនួយមនុស្សធម៌ ដល់ប្រជាជន ដែលរងគ្រោះនៅ អាហ្វហ្គានីស្ថាន ហើយប្រទេសនេះ មិនត្រូវក្លាយជាមូលដ្ឋាន របស់ពួកសកម្មប្រយុទ្ធនោះទេ ។
សហភាពអឺរ៉ុប បានបើកកិច្ចប្រជុំកំពូល G20 និម្មិតដោយសន្យាផ្តល់កញ្ចប់ថវិកាចំនួន ១ពាន់លានអឺរ៉ូ រួមទាំងប្រាក់សម្រាប់ តម្រូវការមនុស្សធម៌បន្ទាន់ និងប្រទេសជិតខាងអាហ្វហ្គានីស្ថាន ដែលទទួលយកជនជាតិ អាហ្វហ្គានីស្ថាន ដែលភៀសខ្លួនពីពួកតាលីបង់ ។
ក្រុមតាលីបង់ដ៏រឹងរូស កំពុងស្វែងរកការទទួលស្គាល់ ក៏ដូចជាជំនួយ ដើម្បីចៀសវាងគ្រោះមហន្តរាយមនុស្សធម៌ បន្ទាប់ពីពួកគេបានវិល ត្រឡប់មកកាន់អំណាចវិញ នៅខែសីហាបន្ទាប់ពីការ ដកកងទ័ពអាមេរិក។
ប្រធានគណៈកម្មាការសហភាព អឺរ៉ុបលោកស្រី Ursula von der Leyen បានលើកឡើងថា ជំនួយនេះមានន័យថា“ ដើម្បីបញ្ចៀសការដួលរលំផ្នែក មនុស្សធម៌ និងសេដ្ឋកិច្ចសង្គម នៅ អាហ្វហ្គានីស្ថាន” ។
លោកស្រីបានសង្កត់ធ្ងន់ថា មូលនិធិនេះគឺជា“ ការគាំទ្រដោយផ្ទាល់” សម្រាប់អាហ្វហ្គានីស្ថានហើយនឹងត្រូវបញ្ជូនទៅឱ្យអង្គការអន្តរជាតិមិនមែន ចំពោះរដ្ឋាភិបាលបណ្តោះអាសន្នរបស់តាលីបង់ ដែលទីក្រុងព្រុចសែល មិនទទួលស្គាល់នោះទេ។
លោកស្រីបានបញ្ជាក់បន្ថែមថា “ យើងបានដឹងច្បាស់អំពីល័ក្ខខ័ណ្ឌរបស់យើង សម្រាប់ការចូលរួមណាមួយជាមួយអាជ្ញាធរអាហ្វហ្គានីស្ថាន រួមទាំងការគោរពសិទ្ធិមនុស្ស” ៕
ដោយ ឈូក បូរ៉ា
