តេអេរ៉ង់៖ លេខាធិការនៃក្រុមប្រឹក្សាសន្តិសុខជាតិជាន់ខ្ពស់របស់អ៊ីរ៉ង់ លោក Ali Shamkhani បានលើកឡើងថា មធ្យោបាយដ៏ល្អបំផុត ដើម្បីជម្នះបញ្ហាក្នុងតំបន់ គឺត្រូវបង្កើតយន្តការជាក់លាក់ចំពោះលក្ខណៈក្នុងតំបន់ តាមរយៈការចូលរួមពីបណ្តាប្រទេសក្នុងតំបន់ទាំងអស់ ។
ទូរទស្សន៍រដ្ឋរបស់អ៊ីរ៉ង់បានរាយការណ៍ថា លោក Shamkhani បានលើកឡើងពីអំពើភេរវកម្ម ការឈ្លានពានរបស់យោធាបរទេស ក៏ដូចជាការធ្វើចំណាកស្រុក ដែលជាបញ្ហាសន្តិសុខដ៏សំខាន់ដែលតំបន់ប្រឈមមុខ។
លោកបានឲ្យដឹងនៅក្នុងកិច្ចប្រជុំជាមួយសមភាគីរុស្ស៊ីលោក Nikolai Patrushev នៅខាងក្រៅកិច្ចពិភាក្សាសន្តិសុខក្នុងតំបន់ ស្តីពីអាហ្វហ្គានីស្ថាន ដែលធ្វើឡើងនៅប្រទេសឥណ្ឌាថា “ផ្លូវចេញពីលក្ខខណ្ឌទាំងនេះ គឺត្រូវបញ្ចប់ការធ្វើអន្តរាគមន៍ពីប្រទេសឆ្លងតំបន់ ជាពិសេសសហរដ្ឋអាមេរិក” ។ .
លោកបានបន្តថា ការជំរុញកិច្ចសហប្រតិបត្តិការក្នុង ចំណោមរដ្ឋក្នុងតំបន់ ដើម្បីដោះស្រាយបញ្ហា ជនជាតិដើមភាគតិចចំពោះ វិបត្តិក៏នឹងមានប្រយោជន៍ក្នុងបញ្ហានេះដែរ។
លោកក៏បានជំរុញកិច្ចសហប្រតិបត្តិការរវាងអ៊ីរ៉ង់ និងរុស្ស៊ី និងការពង្រីកទំនាក់ទំនងទ្វេភាគីឱ្យកាន់តែទូលំទូលាយ ជាពិសេសក្នុងវិស័យសន្តិសុខ និងការប្រយុទ្ធប្រឆាំងនឹងអំពើភេរវកម្ម។
ទាក់ទងទៅនឹងស្ថានភាពសន្តិសុខក្នុងប្រទេសអាហ្វហ្គានីស្ថាន លោក Shamkhani បានរំលឹកឡើងវិញនូវគោលជំហររបស់អ៊ីរ៉ង់ ដោយប្រកាសថា “ដោយសារសមាសភាពជនជាតិ និងសាសនានៃសង្គមអាហ្វហ្គានីស្ថាន ដំណោះស្រាយចំពោះវិបត្តិនៅក្នុងប្រទេសនេះ គឺការបន្តកិច្ចសន្ទនាអន្តរអាហ្វហ្គានីស្ថាន និងការបង្កើតការរួមបញ្ចូលរដ្ឋាភិបាល”។
សម្រាប់ផ្នែករបស់លោកវិញ លោក Patrushev បានស្វាគមន៍កិច្ចប្រជុំដែលកំពុងបន្ត និងការសន្ទនាសម្រាប់គោលបំណងសន្តិសុខក្នុងចំណោមបណ្តាប្រទេសក្នុងតំបន់ ដោយនិយាយថា កង្វល់រួមលើបញ្ហាប្រឈមផ្នែកសន្តិសុខបានធ្វើឱ្យប្រទេសទាំងនេះកាន់តែខិតជិតគ្នាទៅវិញទៅមក៕
ដោយ ឈូក បូរ៉ា
