តូក្យូ៖ នាយករដ្ឋមន្ត្រីជប៉ុនលោក ហ្វូមីអូ គីស៊ីដា យល់ព្រមជាមួយឧត្តមនាវីឯក John Aquilino មេបញ្ជាការបញ្ជាការដ្ឋានឥណ្ឌូប៉ាស៊ីហ្វិករបស់ សហរដ្ឋអាមេរិក ដើម្បីពង្រឹងសម្ព័ន្ធភាពជប៉ុន-អាមេរិក និងធ្វើការឆ្ពោះទៅកាន់ឥណ្ឌូប៉ាស៊ីហ្វិកដោយសេរី និងបើកចំហ ចំពេលមានការកើនឡើងឥទ្ធិពលរបស់ចិន និងការគំរាមកំហែងមីស៊ីល របស់កូរ៉េខាងជើង។
ក្នុងអំឡុងពេលនៃកិច្ចប្រជុំប្រហែល ២០នាទីដែលត្រូវបានប្រារព្ធឡើងមួយថ្ងៃបន្ទាប់ពីលោក គីស៊ីដា ត្រូវបានជាប់ឆ្នោតជានាយករដ្ឋមន្ត្រីម្តងទៀតនោះ អ្នកទាំងពីរបានចែករំលែកការព្រួយបារម្ភទាក់ទងនឹងការប៉ុនប៉ងឯកតោភាគីរបស់ចិន ក្នុងការកែប្រែស្ថានភាពក្នុងតំបន់ និងផ្លាស់ប្តូរទស្សនៈស្តីពីការបាញ់សាកល្បងកាំជ្រួចរបស់កូរ៉េខាងជើង នេះបើតាមរដ្ឋាភិបាលជប៉ុន។
លោក គីស៊ីដា បានឲ្យដឹងនៅដើមដំបូងនៃកិច្ចប្រជុំថា “តាមរយៈការបង្កើនកិច្ចសហប្រតិបត្តិការរវាងប្រទេសជប៉ុន និងសហរដ្ឋអាមេរិក ខ្ញុំចង់សម្រេចបាននូវឥណ្ឌូប៉ាស៊ីហ្វិកសេរី និងបើកចំហ” ។
លោក Aquilino បានឆ្លើយតបថា លោកបានប្តេជ្ញាចិត្តក្នុងការ “ផ្តល់នូវឥណ្ឌូប៉ាស៊ីហ្វិកដោយសេរី និងបើកចំហ ព្រមទាំងសន្តិភាព និងស្ថិរភាព និងវិបុលភាពសម្រាប់តំបន់”។
មេបញ្ជាការក៏បានជួបកាលពីថ្ងៃព្រហស្បតិ៍ជាមួយរដ្ឋមន្ត្រីការពារជាតិ Nobuo Kishi និងរដ្ឋមន្ត្រីការបរទេសថ្មីរបស់ជប៉ុន Yoshimasa Hayashi ដែលបានចូលកាន់តំណែងកាលពីថ្ងៃមុននៅពេលដែលលោក គីស៊ីដា បានបង្កើតគណៈរដ្ឋមន្ត្រីទីពីររបស់លោក បន្ទាប់ពីត្រូវបានបោះឆ្នោតជ្រើសរើសជាមេដឹកនាំជប៉ុនជាថ្មីដោយសភា។
លោក Hayashi បានអំពាវនាវឱ្យពង្រឹងការរារាំងក្រោមសម្ព័ន្ធភាពទ្វេភាគី។ លោក Kishi បានឲ្យដឹងក្នុងអំឡុងពេលកិច្ចប្រជុំរបស់ពួកគេថា “បរិយាកាសសន្តិសុខជុំវិញប្រទេសជប៉ុន កាន់តែធ្ងន់ធ្ងរ” ដោយសំដៅទៅលើស្ថានភាពរបស់ប្រទេសចិន និងកូរ៉េខាងជើង។
នៅពេលដែល Kishi និង Aquilino បានជួបគ្នាចុងក្រោយនៅក្នុងខែមិថុនា ពួកគេបានយល់ព្រមលើសារៈសំខាន់នៃសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់ នេះបើយោងតាមរដ្ឋាភិបាលជប៉ុន៕
