ហ្សឺណែវ៖ លោក Sun Zhenyu ឯកអគ្គរដ្ឋទូតទីមួយ របស់ប្រទេសចិនប្រចាំ WTO បានឲ្យដឹងថា ការចូលជាសមាជិករបស់ អង្គការពាណិជ្ជកម្មពិភពលោក (WTO) បានបង្កើនល្បឿនដំណើរការ សកលភាវូបនីយកម្ម សេដ្ឋកិច្ចរបស់ប្រទេស និងជំរុញកំណើនយ៉ាង ឆាប់រហ័សរបស់ខ្លួន។
ប្រទេសចិនបានចូលជាសមាជិក WTO ជាផ្លូវការនៅថ្ងៃទី១១ ខែធ្នូ ឆ្នាំ២០០១ ដោយបានក្លាយជាសមាជិកទី ១៤៣ នៃស្ថាប័នពាណិជ្ជកម្មពិភពលោក។ ក្នុងនាមជាឯកអគ្គរដ្ឋទូត ទីមួយរបស់ប្រទេសចិនប្រចាំ WTO លោក Sun បានចាប់ផ្តើមបេសកកម្ម ការទូតរយៈពេល ៩ឆ្នាំ របស់លោកនៅទីក្រុងហ្សឺណែវ ក្នុងខែមករា ឆ្នាំ២០០២។
ចាប់តាំងពីប្រទេសចិន បានក្លាយជាសមាជិក WTO ពាណិជ្ជកម្មរបស់ខ្លួនបានបន្ត រីកចម្រើនយ៉ាងឆាប់រហ័ស។ Sun បានប្រាប់សារព័ត៌មានចិនស៊ិនហួ នៅក្នុងបទសម្ភាសន៍ជាលាយលក្ខណ៍អក្សរ កាលពីពេលថ្មីៗនេះថា សហគ្រាសចិន បានទប់ទល់នឹងការប្រកួតប្រជែងអន្តរជាតិ និងបញ្ចេញសក្តានុពលដ៏ធំសម្បើម។
មានក្រុមហ៊ុនចិនតិចជាង 20 នៅក្នុងបញ្ជី Fortune Global 500 កាលពី ២ទសវត្សរ៍មុន ប៉ុន្តែចំនួននេះបានឈានដល់ ១៣៣ ក្នុងឆ្នាំ២០២0 ដែលវ៉ាដាច់សហរដ្ឋអាមេរិក ជាលើកដំបូង។
លោក Sun បានលើកឡើងថា ប្រទេសចិនបានផ្តល់ពេញលេញ លើការប្តេជ្ញាចិត្តក្នុងការចូលជាសមាជិក WTO កែប្រែច្បាប់ និងបទប្បញ្ញត្តិរបស់ខ្លួន ស្របតាមការប្តេជ្ញាចិត្តរបស់ WTO និងបានបង្កើតប្រព័ន្ធសេដ្ឋកិច្ច និងពាណិជ្ជកម្មដែលស្របតាម ច្បាប់របស់ WTO ដូចដែលបានគ្រោងទុក។
ពន្ធជាមធ្យមត្រូវបានកាត់បន្ថយពី ១៥,៣ ភាគរយក្នុងឆ្នាំ២០០១ មកនៅត្រឹម ៩,៨ភាគរយក្នុងឆ្នាំ២០១០។ នៅឆ្នាំ២០២០ កម្រិតពន្ធជាមធ្យមបានធ្លាក់ចុះ បន្ថែមទៀតមកត្រឹម ៧,៤ ភាគរយ។ លោកបានបន្ថែមថា អតីតអគ្គនាយក WTO លោក Pascal Lamy បានផ្តល់ឱ្យប្រទេសចិននូវចំណាត់ថ្នាក់ A+ សម្រាប់បំពេញតាមការសន្យារបស់ WTO ។
ក្នុងអំឡុងពេលបេសកកម្មរបស់លោក នៅទីក្រុងហ្សឺណែវ លោក Sun បានឃើញពីឥទ្ធិពល របស់ប្រទេសចិននៅក្នុង WTO ដែលកំពុងកើនឡើង។ លោកបានលើកឡើងថា ប្រទេសចិន បានចូលរួមក្នុងការចរចារសំខាន់ៗរបស់ WTO បន្ទាប់ពីសន្និសីទថ្នាក់រដ្ឋមន្ត្រីរបស់ WTO លើកទី៥ នៅទីក្រុង Cancun ប្រទេសម៉ិកស៊ិក ក្នុងឆ្នាំ២០០៣ ៕
ដោយ ឈូក បូរ៉ា
