តូក្យូ ៖ កាសែត Japan Times បានចុះផ្សាយកាលពីពេលថ្មីៗនេះថា កិច្ចប្រជុំកំពូលលទ្ធិប្រជាធិបតេយ្យ របស់ប្រធានាធិបតី អាមេរិក លោក ចូ បៃដិន នឹងទំនងជាមិនមានលទ្ធផល ច្បាស់លាស់នោះទេ ហើយបញ្ចប់ទៅដោយគ្រាន់តែជា “កន្លែងពិភាក្សាមួយផ្សេងទៀត” ។
នៅថ្ងៃទី០៩ និងទី១០ ខែធ្នូខាងមុខនេះ ប្រធានាធិបតីអាមេរិកលោក ចូ បៃដិន នឹងធ្វើជាម្ចាស់ផ្ទះនូវអ្វីដែលសេតវិមានហៅថា កិច្ចប្រជុំកំពូល សម្រាប់លទ្ធិប្រជាធិបតេយ្យ នេះបើយោងតាមការចុះផ្សាយ របស់ទីភ្នាក់ងារសារព័ត៌មានចិនស៊ិនហួ។
កាសែត Japan Times បានឲ្យដឹងនៅក្នុងអត្ថាធិប្បាយមួយ កាលពីថ្ងៃទី២៨ ខែវិច្ឆិកា ឲ្យដឹងថាកិច្ចប្រជុំកំពូលនេះ ទំនងជាមិនមានផលប៉ះពាល់ យូរអង្វែងនោះទេ ។
ការអត្ថាធិប្បាយបានឲ្យដឹងថា ការសិក្សារបស់អ្នកស្រាវជ្រាវ នៅសាកលវិទ្យាល័យ Cambridge បានរកឃើញថា ការមិនពេញចិត្តជាអន្តរជាតិ ចំពោះលទ្ធិប្រជាធិបតេយ្យ ជាទម្រង់រដ្ឋាភិបាលមួយ បានឈានដល់កម្រិតខ្ពស់បំផុត ក្នុងរយៈពេលជាង ២ទសវត្សរ៍ ដោយមានកត្តាជាច្រើន ដែលគាំទ្រការផ្លាស់ប្តូរនេះ ។
ទោះបីជាប្រធានាធិបតីអាមេរិក កំពុងរៀបចំកិច្ចប្រជុំកំពូលក៏ដោយ រូបភាពនៃលទ្ធិប្រជាធិបតេយ្យ របស់សហរដ្ឋអាមេរិក នៅជុំវិញពិភពលោកបានទទួលរង នូវការវាយដំដ៏អាក្រក់ ក្នុងរយៈពេលប៉ុន្មានឆ្នាំចុងក្រោយនេះ។
នៅក្នុងការស្ទង់មតិរបស់មជ្ឈមណ្ឌលស្រាវជ្រាវ Pew នាពេលថ្មីៗនេះ ទៅលើប្រជាជននៅក្នុងប្រទេសចំនួន ១៧ ផ្សេងៗគ្នា អ្នកឆ្លើយសំណួរប្រហែល ៥៧ភាគរយបានលើកឡើងថា លទ្ធិប្រជាធិបតេយ្យរបស់សហរដ្ឋអាមេរិក មិនមែនជាគំរូល្អទេក្នុងប៉ុន្មានឆ្នាំថ្មីៗនេះ។
ទន្ទឹមនឹងនេះ មានតែអ្នកឆ្លើយសំណួរជាមធ្យម ១៧ ភាគរយប៉ុណ្ណោះ ដែលលើកឡើងថា លទ្ធិប្រជាធិបតេយ្យរបស់សហរដ្ឋអាមេរិក បានផ្តល់ជាគំរូដ៏ល្អ សម្រាប់ប្រទេសផ្សេងទៀត ។
ការអត្ថាធិប្បាយបានឲ្យដឹងទៀតថា ទស្សនៈពិភពលោកដ៏អាក្រក់នៃលទ្ធិប្រជាធិបតេយ្យ របស់សហរដ្ឋអាមេរិក នឹងធ្វើឱ្យប៉ះពាល់ដល់ប្រធានាធិបតី សហរដ្ឋអាមេរិក និងរដ្ឋបាលរបស់លោក នៅក្នុងកិច្ចប្រជុំកំពូលនេះ។
វានឹងរារាំងសមត្ថភាព របស់លោក បៃដិន ក្នុងការនាំមុខលើបញ្ហា នានា រួមទាំងការបញ្ចុះបញ្ចូល អ្នកចូលរួមឱ្យចេញសេចក្តីថ្លែងការណ៍រួម មួយយ៉ាងពិតប្រាកដអំពីវិធីដែល ជាពិសេសពួកគេមានផែនការ ដើម្បីផ្លាស់ប្តូរការតំរែតំរង់ តាមបែបប្រជាធិបតេយ្យសកល ។ របាយការណ៍បានបន្ថែមទៀតថា បើគ្មានគោលបំណង ច្បាស់លាស់នោះទេ កិច្ចប្រជុំកំពូលអាចនឹងត្រូវបានបញ្ចប់ គ្រាន់តែជាកន្លែងនិយាយមួយ ផ្សេងទៀតប៉ុណ្ណោះ ៕
