បរទេស៖ ក្រសួងការពារជាតិរុស្ស៊ី បានរាយការណ៍ថា យន្តហោះចម្បាំងប្រភេទ Su-27 របស់រុស្សី កាលពីថ្ងៃពុធ បានហោះសម្រុកដើម្បីស្ទាក់ និងហោះអមដំណើរ (បណ្តេញ) យន្តហោះចម្បាំង Rafale និង យន្តហោះចម្បាំងប្រភេទ Mirage-2000 របស់ប្រទេសបារាំង ក៏ដូចជាយន្តហោះចាក់សាំង លើអាកាសប្រភេទ C-135 របស់កងទ័ពអាកាសបារាំង នៅពេលពួកគេ បានហោះហើរលើសមុទ្រខ្មៅ។
![](https://dap-news.com/wp-content/uploads/2021/12/219-1024x768.jpg)
យោងតាមសារព័ត៌មាន Sputnik ចេញផ្សាយនៅថ្ងៃទី៨ ខែធ្នូ ឆ្នាំ២០២១ បានឱ្យដឹងដោយផ្អែកតាម សេចក្តីថ្លែងការណ៍ របស់ក្រសួងការពារជាតិរុស្ស៊ីថា «នាវិកយន្តហោះចម្បាំងរុស្ស៊ី បានកំណត់គោលដៅ ពីលើអាកាសថា ជាយន្តហោះចម្បាំង យុទ្ធសាស្ត្រពីរគឺ ទី១ យន្តហោះចម្បាំង Mirage-2000 និង ទី២ គឺយន្តហោះចម្បាំងប្រភេទ Rafale ក៏ដូចជា យន្តហោះចាក់សាំង លើអាកាសប្រភេទ C-135 របស់កងកម្លាំងអាកាស និងអវកាសបារាំង ហើយបានអមដំណើរពួកគេ នៅលើសមុទ្រខ្មៅ។
ក្រសួងបាននិយាយ នៅក្នុងសេចក្តីថ្លែងការណ៍មួយថា ការរំលោភលើព្រំដែនរដ្ឋ មិនត្រូវបានអនុញ្ញាតិ ឱ្យកើតឡើងនោះទេ។ យន្តហោះចម្បាំង ត្រូវបានគេនិយាយថា បានហោះយ៉ាងប្រញាប់ប្រញាល់ បន្ទាប់ពីបណ្តាញរ៉ាដា របស់រុស្ស៊ី បានចាប់យកគោលដៅ ពីលើអាកាសជាច្រើន ដែលបានខិតជិតព្រំដែន នៅក្នុងតំបន់ដែលមិនបានបញ្ជាក់ នៃសមុទ្រខ្មៅ៕ ប្រែសម្រួលៈ ណៃ តុលា
![](https://dap-news.com/wp-content/uploads/2020/08/1-1.png)