វ៉ាស៊ីនតោន៖ អ្នកវិភាគបានលើកឡើងថា សហរដ្ឋអាមេរិកកំពុងលេង “ល្បែងគ្រោះថ្នាក់” ជាមួយនឹងអ្វីដែលគេហៅថា “កិច្ចប្រជុំកំពូលដើម្បីលទ្ធិប្រជាធិបតេយ្យ” ព្រោះវានឹងធ្វើឱ្យមានការបែកបាក់ក្នុងចំណោមសហគមន៍ពិភពលោក។
កិច្ចប្រជុំកំពូលលទ្ធិប្រជាធិបតេយ្យ “សមនឹងទទួលបានការយកចិត្តទុកដាក់យ៉ាងខ្លាំង ពីបណ្តាប្រទេសពាក់ព័ន្ធ ពីព្រោះនៅទីនេះ តួអង្គសំខាន់គឺជាមហាអំណាចសេដ្ឋកិច្ចសកល និងអ្នកមានឥទ្ធិពលលើពិភពលោក ដោយព្យាយាមបង្កើតបន្ទាត់បែងចែកមួយចំនួនរវាងប្រទេសណាខ្លះជាប្រជាធិបតេយ្យ និងប្រទេសណាមិនមែនជាប្រទេសប្រជាធិបតេយ្យ”
លោក Eyob Belachew, អ្នកវិភាគនយោបាយ និងទំនាក់ទំនងអន្តរជាតិអេត្យូពីបានប្រាប់កាសែតចិនស៊ិនហួ ក្នុងបទសម្ភាសន៍ថ្មីៗនេះឲ្យដឹងថា “ការបង្កើតបន្ទាត់បែងចែកមួយចំនួន ដោយជៀសវាងអ្នកដទៃជាអ្នកគ្រប់គ្រងដោយស្វ័យប្រវត្តិគឺជាល្បែងដ៏គ្រោះថ្នាក់បំផុត”។
សហរដ្ឋអាមេរិក នឹងរៀបចំអ្វីដែលគេហៅថា “កិច្ចប្រជុំកំពូលដើម្បីលទ្ធិប្រជាធិបតេយ្យ” នៅខែនេះ ដែលក្នុងនោះភ្ញៀវ និងអ្នកចូលរួមត្រូវបានជ្រើសរើសតាមនិយមន័យ និងស្តង់ដារប្រជាធិបតេយ្យរបស់អាមេរិក។
លោកបានអំពាវនាវឱ្យរដ្ឋបាលសហរដ្ឋអាមេរិកដើរតួនាទីស្ថាបនាជាជាងការបែងចែកសហគមន៍ពិភពលោកក្រោមលេសនៃលទ្ធិប្រជាធិបតេយ្យ និងធ្វើការឆ្ពោះទៅរក “សណ្តាប់ធ្នាប់សកល ដែលមានស្ថិរភាព ហើយជាការពិតណាស់លើកកម្ពស់ពហុភាគីនិយម”។
លោក Belachew បានសង្កត់ធ្ងន់ថា សហរដ្ឋអាមេរិកអាចបំបែកសហគមន៍សកលលោក និងជំរុញទំនាក់ទំនងរវាងប្រទេសនានា ដោយបន្ថែមថាលទ្ធិប្រជាធិបតេយ្យ “គឺជាអ្វីគ្រប់យ៉ាងអំពីប្រជាជន វាកំពុងការពារផលប្រយោជន៍របស់ប្រជាជន”។
លោកបានគូសបញ្ជាក់ថា គោលបំណងសំខាន់នៃលទ្ធិប្រជាធិបតេយ្យ គឺដើម្បីជំរុញសេដ្ឋកិច្ច និងសុខុមាលភាពបញ្ញារបស់មនុស្សជាតិ៕ ដោយ ឈូក បូរ៉ា
