សេអ៊ូល ៖ កូរ៉េខាងត្បូងបានឲ្យដឹងថា ខ្លួននឹងនាំយកវិធានការ ទប់ស្កាត់ជំងឺកូវីដ-១៩ ឡើងវិញ ចាប់ពីថ្ងៃសៅរ៍នេះ ខណៈដែលករណីជំងឺកូវីដ-១៩ ប្រចាំថ្ងៃនៅតែបន្តកើន ឡើងយ៉ាងខ្លាំង ត្រឹមតែមួយ ខែកន្លះប៉ុណ្ណោះ បន្ទាប់ពីការធ្លាក់ចុះ នេះបើយោងតាមការចុះផ្សាយ របស់ទីភ្នាក់ងារសារ ព័ត៌មានក្យូដូជប៉ុន ។
នាយករដ្ឋមន្ត្រីលោក Kim Boo Kyum បានឲ្យដឹងនៅថ្ងៃព្រហស្បតិ៍នេះថា ការរឹតបន្តឹងមួយចំនួន ដែលត្រូវបាន រចនាឡើងថ្មី ដើម្បីឆ្លើយតបទៅនឹង ស្ថានភាព បច្ចុប្បន្ននឹងកាត់បន្ថយ ទំហំអតិបរមា នៃការជួបជុំឯកជន ដល់មនុស្ស ៤ នាក់ ដរាបណាទាំងអស់គ្នា ត្រូវបានចាក់វ៉ាក់សាំងពេញលេញ ។ អ្នក ដែល មិន បានចាក់វ៉ាក់សាំង គឺ អនុញ្ញាត ឱ្យ ញ៉ាំ អាហារ តែ ម្នាក់ ឯង។
លោក Kim បានលើកឡើងថា ការទប់ស្កាត់ក៏នឹង តម្រូវឱ្យភោជនីយដ្ឋាន និងហាងកាហ្វេបិទនៅម៉ោង ៩យប់ផងដែរ។ លោកបានបន្ដថា ច្បាប់រក្សាគម្លាតសង្គម ដែលបានកែសម្រួលនឹង មាន រយៈពេលរហូត ដល់ថ្ងៃទី០២ ខែមករា ខណៈដែលរដ្ឋាភិបាល នឹងពិនិត្យស្ថានភាពឡើងវិញ នៅចុងឆ្នាំនេះ ។
រដ្ឋាភិបាលកាលពីថ្ងៃទី០១ ខែវិច្ឆិកា បានលុបចោលច្បាប់រក្សាគម្លាតសង្គម និងអនុវត្តគោលនយោបាយ “រស់នៅជាមួយជំងឺកូវីដ-១៩” របស់ខ្លួន។ ទោះជាយ៉ាងនេះក្តី ជាមួយនឹងការដាក់ ឱ្យប្រើប្រាស់ឡើងវិញនូវច្បាប់នេះ គោលនយោបាយនេះនឹង មានសុពលភាពត្រឹមតែ ៤៧ថ្ងៃប៉ុណ្ណោះ។
ប្រទេសនេះបានរាយការណ៍ករណីថ្មីចំនួន ៧៦២២ករណីកាលពីថ្ងៃពុធ ដោយភាគច្រើន ផ្តោតលើទីក្រុងសេអ៊ូល និងខេត្ត Gyeonggi ដែលនៅជិតខាង ខណៈដែលចំនួនអ្នកជម្ងឺធ្ងន់ធ្ងរបានកើនឡើងដល់ ៩៨៩នាក់ នេះបើយោងតាមអាជ្ញាធរ សុខាភិបាល។
គួរបញ្ជាក់ថា គិតត្រឹមថ្ងៃព្រហស្បតិ៍នេះ អត្រានៃប្រជាជនកូរ៉េខាងត្បូង ដែលទទួលថ្នាំបង្ការពេញ លេញបានឈានដល់ ៨១,៥ភាគរយ៕
ដោយ ឈូក បូរ៉ា
