ព្យុងយ៉ាង ៖ ប្រទេសកូរ៉េខាងជើង នៅថ្ងៃសុក្រនេះ បានប្រារព្ធខួបលើកទី១០ នៃការស្លាប់របស់មេដឹកនាំទីពីររបស់ប្រទេសលោក គីម ជុងអ៊ីល ជាមួយនឹងប្រព័ន្ធផ្សព្វផ្សាយ រដ្ឋបានសាទរ ចំពោះ “ការធ្វើបដិវត្តន៍” របស់លោកមុន និងក្នុងអំឡុងពេលនៃការកាន់អំណាច ១៧ឆ្នាំ។
ទីភ្នាក់ងារសារព័ត៌មានមជ្ឈិមកូរ៉េបានរាយការណ៍ថា កាលពីថ្ងៃព្រហស្បតិ៍ ពិធីគោរពវិញ្ញាណក្ខន្ធមួយត្រូវបានធ្វើឡើងនៅស្ថានទូតកូរ៉េខាងជើង ក្នុងរដ្ឋធានីប៉េកាំង នៃប្រទេស ចិន ក្នុង ឱកាសខួបគម្រប់ខួបនេះ ទីភ្នាក់ងារសារព័ត៌មានកណ្តាលកូរ៉េ បានរាយការណ៍ដោយគូស បញ្ជាក់អំពីស្ថានភាព ទំនាក់ទំនង ដែលមានសុខភាពល្អ រវាងប្រជាជាតិទាំងពីរ។
បន្ទាប់ពីលោក គីម ជុងអ៊ីល បានទទួលមរណភាពដោយជំងឺគាំងបេះដូង កាលពីថ្ងៃទី១៧ ខែធ្នូ ឆ្នាំ ២០១១ ក្នុងអាយុ ៦៩ ឆ្នាំ កូនប្រុសរបស់លោក និងជាមេដឹកនាំបច្ចុប្បន្នលោក គីម ជុងអ៊ុន បានទទួលមរតកភាព ជាអ្នកដឹកនាំ របស់ប្រទេសកូរ៉េខាងជើង ដែលត្រូវបានបង្កើតឡើងក្នុងឆ្នាំ១៩៤៨ ដោយមានការគាំទ្រពីសហភាពសូវៀត ដែលជាអ្នកកាន់តំណែង មុនរបស់រុស្ស៊ី ។
លោក Wang Chen សមាជិកការិយាល័យ នយោបាយ នៃគណៈកម្មាធិការមជ្ឈិមបក្សកុម្មុយនិស្តចិន ត្រូវបានដកស្រង់ដោយ KCNA ដែលបានឲ្យដឹងនៅ ឯពិធីរំលឹកខួបថា លោក គីម ជុងអ៊ីល”បានរួមចំណែកយ៉ាងធំធេង ចំពោះការអភិវឌ្ឍន៍” នៃទំនាក់ទំនងចិន-កូរ៉េខាងជើង។
លោកក៏បានលើកឡើងផងដែរថា ទំនាក់ទំនងមិត្តភាពប្រពៃណីរវាងចិន និងកូរ៉េខាងជើង “បានបម្រើជាទ្រព្យសម្បត្តិដ៏មានតម្លៃ សម្រាប់ភាគីទាំងពីរ” នេះបើយោងតាមទីភ្នាក់ងារសារព័ត៌មាន។
នៅលើភ្នំ Mansu ក្នុងបេះដូងនៃរដ្ឋធានី ព្យុងយ៉ាង របស់ប្រទេសកូរ៉េខាងជើង ប្រជាពលរដ្ឋ កាលពីថ្ងៃព្រហស្បតិ៍ បានដាក់កម្រងផ្កា និងក្រាបថ្វាយបង្គំនៅមុខរូបសំណាក ដ៏ធំរបស់លោក គីម ជុងអ៊ីល និងឪពុករបស់លោក និងជាស្ថាបនិក ប្រទេសលោក គីម អ៊ីលស៊ុង ដែលបានទទួលមរណភាពក្នុងឆ្នាំ១៩៩៤ ៕
ដោយ ឈូក បូរ៉ា
