បរទេស ៖ រដ្ឋមន្ត្រីការពារជាតិ អាល្លឺម៉ង់ លោកស្រី Christine Lambrecht បាននិយាយ កាលពីថ្ងៃអាទិត្យ ក្នុងពេលធ្វើទស្សនកិច្ច កងទ័ពអាល្លឺម៉ង់ ឈរប្រចាំការ នៅក្នុងប្រទេសលីទុយអានី ដើម្បីទប់ស្កាត់ការវាយប្រហារ រុស្សីថា អង្គការណាតូ នឹងធ្វើការពិភាក្សាគ្នា អំពីសំណើសន្តិសុខរបស់ប្រទេសរុស្ស៊ី ប៉ុន្តែនឹងមិនអនុញ្ញាតឲ្យទីក្រុងមូស្គូ កំណត់គោលជំហរយោធា របស់សម្ពន្ធមិត្តឡើយ ។
លោកស្រី បានមានប្រសាសន៍ ប្រាប់អ្នកសារព័ត៌មាន នៅក្នុងទីក្រុង Rukla ក្នុងខណៈដំណើរ ទស្សនកិច្ច សួរសុខទុក្ខកងទ័ព នៅបរទេសដំបូង របស់លោក ស្រីថា “យើងចាំបាច់ត្រូវតែដោះស្រាយ ភាពតានតឹងបច្ចុប្បន្ន តាមកម្រិតការទូត ប៉ុន្តែក៏បានបង្កើនការ ទប់ស្កាត់ដ៏គួរឲ្យជឿ ទុកចិត្តបានផងដែរ” ។
គួរបញ្ជាក់ថា កាលពីថ្ងៃសុក្រ សប្ដាហ៍មុន ទីក្រុងមូស្គូបានដាក់ចេញបញ្ជី ទាមទារមួយ ឲ្យលោកខាងលិច ដែលរួមមានទាំងការ ឲ្យដកកងទ័ព ណាតូ ចេញពីប្រទេសប៉ូឡូញ ប្រទេសអេស្តនី ប្រទេសឡាតវី និងប្រទេស លីទុយអានី ដែលធ្លាប់ជាផ្នែកនៃសហភាពសូវៀត ។
ក្រៅពីនោះ ប្រទេសរុស្ស៊ី ក៏ទាមទារ ឲ្យមានការធានា ស្របច្បាប់ថា អង្គការណាតូ នឹងបោះបង់ចោល សកម្មភាពយោធា នៅក្នុងតំបន់អឺរ៉ុបភាគខាងកើត និងអ៊ុយក្រែន និងការវេតូរបស់រុស្ស៊ីមានប្រសិទ្ធភាព លើភាពជាសមាជិកណាតូនាពេលអនាគត សម្រាប់ប្រទេស អ៊ុយក្រែន ៕
ប្រែសម្រួល៖ប៉ាង កុង
