បរទេស៖ រដ្ឋមន្ត្រីការបរទេសរុស្ស៊ី បាននិយាយនៅថ្ងៃពុធនេះថា មន្ត្រីចរចារុស្ស៊ីនិងអាមេរិក នឹងអង្គុយពិភាក្សាគ្នា នៅដើមឆ្នាំក្រោយ ដើម្បីជជែកពីការទាមទារ របស់ទីក្រុងមូស្គូ ឲ្យលោកខាងលិច ធានាមិនពង្រីកវិសាលភាព របស់អង្គការសម្ពន្ធមិត្ត ណាតូ ទៅប្រទេសអ៊ុយក្រែន។
លោករដ្ឋមន្ត្រីការបរទេស Sergey Lavrov បានមានប្រសាសន៍ថា នៅក្នុងខែមករា ប្រទេសរុស្ស៊ីក៏នឹងចាប់ផ្តើម កិច្ចពិភាក្សាផ្សេងគ្នាមួយ ជាមួយអង្គការសម្ពន្ធមិត្តយោធាណាតូ ដើម្បីជជែកពីបញ្ហា និងបន្ថែមថា កិច្ចពិភាក្សាផ្សេងៗគ្នា ក្រោមជំនួយរបស់អង្គការ ដើម្បីសន្តិសុខនិងសហប្រតិបត្តិការ ក្នុងតំបន់អឺរ៉ុប ក៏នឹងត្រូវប្រារព្ធធ្វើឡើងផងដែរ។
កាលពីសប្ដាហ៍មុន ទីក្រុងមូស្គបានចេញ ឯកសារសន្តិសុខព្រាង ទាមទារថា អង្គការណាតូ ត្រូវតែបដិសេធមិនឲ្យ ប្រទេសអ៊ុយក្រែន និងអតីតប្រទេសសហភាពសូវៀត ចូលរួមជាសមាជិក និងត្រូវដកការពង្រាយយោធា សម្ពន្ធមិត្ត នៅក្នុងតំបន់អឺរ៉ុបកណ្ដាល និងខាងកើត។
គួរបញ្ជាក់ថា ទីក្រុងវ៉ាស៊ីនតោន និងសម្ពន្ធមិត្តរបស់ខ្លួន តាមសេចក្តីរាយការណ៍ បានបដិសេធមិនផ្តល់ ការសន្យាបែបនោះទេ ប៉ុន្តែបាននិយាយថា ពួកគេបានត្រៀមខ្លួនរួចជាស្រេច ដើម្បីធ្វើកិច្ចពិភាក្សាគ្នា៕
ប្រែសម្រួល៖ប៉ាង កុង
