បរទេស៖ រដ្ឋាភិបាល របស់ប្រទេសអ៊ីស្រាអែល នៅពេលថ្មីៗនេះ បានអនុម័តផែនការ អភិវឌ្ឍលើតំបន់ Golan Heights និងបង្កើនចំនួនប្រជាជនទ្វេដង នៅក្នុងតំបន់នោះ នេះបើយោងតាម សេចក្តីរាយការណ៍មួយ ដែលចេញផ្សាយ ដោយទីភ្នាក់ងារសារព័ត៌មាន UPI នៅថ្ងៃទី២៧ ខែធ្នូ ឆ្នាំ២០២១។
ផែនការមានទំហំទឹកប្រាក់ ៣១៧លានដុល្លារនេះ ស្វះស្វែងធ្វើការកសាង លំនៅស្ថានថ្មីរាប់ពាន់ អភិវឌ្ឍហេដ្ឋារចនាសម្ព័ន្ធគមនាគមន៍ ធ្វើឲ្យប្រសើរឡើងនូវប្រព័ន្ធវេជ្ជសាស្ត្រនិងប្រព័ន្ធអប់រំ និងបង្កើនចំនួន ប្រជាជនទ្វេដង នៅក្នុងតំបន់ Golan Heights ដែលប្រទេសអ៊ីស្រាអែល បានយកពីប្រទេសស៊ីរី នៅក្នុងអំឡុងសង្គ្រាម Six-Day War នាឆ្នាំ១៩៦៧នោះ ឲ្យសម្រេចនៅត្រឹមចុងទសវត្សនេះ។
នៅក្នុងកិច្ចប្រជុំគណៈរដ្ឋមន្ត្រីមួយកាលពីថ្ងៃអាទិត្យ នាយករដ្ឋមន្ត្រីអ៊ីស្រាអែល លោក Naftali Bennett បានមានប្រសាសន៍ដូច្នេះថា “គោលដៅរបស់យើង គឺធ្វើការបង្កើនចំនួនលំនៅស្ថានទ្វេដងនៅក្នុងតំបន់ Golan Heights ហើយភាពចាំបាច់ត្រូវពង្រឹង ថែទាំនិងផ្សះផ្សាយទីកន្លែងនោះ គឺជារឿងរួមចំពោះយើងទាំងអស់គ្នា”។
គួរបញ្ជាក់ថា ក្រោមផែនការដែលលោក Bennett បានប្រកាសនៅក្នុងខែតុលា ប្រទេសអ៊ីស្រាអែល មានផែនការបង្កើតសហគមន៍ថ្មីពីរ នៅក្នុងតំបន់ និងកសាងផ្ទះថ្មីជាង១១.០០០ រវាងសហគមន៍ថ្មី និងសហគមន៍ ដែលមានស្រាប់៕
ប្រែសម្រួល៖ប៉ាង កុង
