ព្រុចសែល៖ អគ្គលេខាធិការអង្គការណាតូ លោក Jens Stoltenberg បានឲ្យដឹងថា អង្គការសន្ធិសញ្ញាអាត្លង់ទិកខាងជើង (NATO) នៅតែត្រៀមខ្លួនសម្រាប់ការសន្ទនាប្រកបដោយអត្ថន័យជាមួយរុស្ស៊ី នេះបើយោងតាមការចុះផ្សាយរបស់ទីភ្នាក់ងារសារព័ត៌មានចិនស៊ិនហួ។
ថ្លែងនៅក្នុងសន្និសីទសារព័ត៌មានមួយបន្ទាប់ពីកិច្ចប្រជុំវិសាមញ្ញរបស់រដ្ឋមន្ត្រីការបរទេសនៃអង្គការណាតូ លោក Stoltenberg បានលើកឡើងថា កិច្ចប្រជុំនេះបាននិយាយទៅកាន់ការកសាងយោធារបស់រុស្ស៊ី នៅជុំវិញអ៊ុយក្រែន និងផលប៉ះពាល់ សម្រាប់សន្តិសុខអឺរ៉ុប។
លោក បាន លើកឡើងថា សកម្មភាព របស់ រុស្ស៊ី ប៉ះពាល់ យ៉ាង ធ្ងន់ធ្ងរ ដល់ សណ្តាប់ធ្នាប់ សន្តិសុខនៅ អឺរ៉ុប។ “ណាតូ នៅតែប្តេជ្ញាចិត្ត ចំពោះវិធីសាស្រ្តពីរផ្លូវរបស់យើងចំពោះរុស្ស៊ី៖ ការរារាំង និងការការពារដ៏រឹងមាំ រួមជាមួយនឹងការសន្ទនាប្រកបដោយអត្ថន័យ”។
លោក Stoltenberg បានស្វាគមន៍ការត្រៀមខ្លួនរបស់រុស្ស៊ីក្នុងការ “មកតុហើយជជែកគ្នា” នៅសប្តាហ៍ក្រោយ សម្ព័ន្ធមិត្តណាតូ នឹងជួបជាមួយរុស្ស៊ី ក្នុងក្រុមប្រឹក្សា NATO-Russia។ សហរដ្ឋ អាមេរិក និង រុស្ស៊ី វក៏ នឹង ជួប ពិភាក្សា គ្នា នៅ ទីក្រុង ហ្សឺណែវ នៅ ថ្ងៃ ចន្ទ ខាងមុខនេះ ផងដែរ។
លោកបានបន្ដថា “ការចូលរួមជាបន្តបន្ទាប់នៅសប្តាហ៍ក្រោយ គឺជាឱកាសមួយសម្រាប់រុស្ស៊ី ដើម្បីបង្ហាញថា ខ្លួនមានភាពហ្មត់ចត់ ចំពោះការសន្ទនា និងការទូត។ យើងតែងតែត្រៀមខ្លួនជាស្រេច ដើម្បីស្តាប់ការព្រួយបារម្ភរបស់រុស្ស៊ី។ ហើយអង្គការណាតូ នឹងខិតខំប្រឹងប្រែង ដើម្បីស្វែងរកផ្លូវនយោបាយឆ្ពោះទៅមុខ” ។
លោក Stoltenberg បានបន្ថែមថា ណាតូ នឹងចូលរួមក្នុងកិច្ចសន្ទនាជាមួយរុស្ស៊ី “ដោយស្មោះត្រង់ និងលើខ្លឹមសារ” ហើយក៏ “ត្រៀមខ្លួនសម្រាប់លទ្ធភាព ដែលការទូតនឹងបរាជ័យ” លោកបានបញ្ជាក់ថា រដ្ឋមន្ត្រីបានសង្កត់ធ្ងន់ថា “ការឈ្លានពានបន្ថែមទៀតប្រឆាំងនឹងអ៊ុយក្រែននឹងមានផលវិបាកយ៉ាងសំខាន់ សម្រាប់រុស្ស៊ី”៕
