តេអេរ៉ង់ ៖ ទីភ្នាក់ងារព័ត៌មានផ្លូវការ IRNA បានរាយការណ៍ថា ប្រទេសអ៊ីរ៉ង់ បានថ្កោលទោសការសម្រេចចិត្ត របស់សហរដ្ឋអាមេរិក ក្នុងការបង្វែរទ្រព្យសម្បត្តិ អាហ្វហ្គានីស្ថាន ដែលជាប់គាំងរាប់ពាន់លានដុល្លារ ទៅកាន់ក្រុមគ្រួសារ នៃជនរងគ្រោះ ក្នុងព្រឹត្ដិការណ៍ខែ៩ ថ្ងៃទី១១ ថាជា “ការអាម៉ាស់” និង “ប្រឆាំងនឹងមនុស្សធម៌” ។
លោក Saeed Khatibzadeh អ្នកនាំពាក្យក្រសួងការបរទេសអ៊ីរ៉ង់ បានប្រាប់សន្និសីទសារព័ត៌មាន ប្រចាំសប្តាហ៍ថា “នេះមិនមែនជាលើកទីមួយនោះទេ ដែលសហរដ្ឋអាមេរិក លួចទ្រព្យសម្បត្តិរបស់ប្រទេសដទៃ” ។
លោក Khatibzadeh បានលើកឡើង ថា សហរដ្ឋអាមេរិកគិតថា ខ្លួនអាចរឹបអូសទ្រព្យសម្បត្តិ របស់ប្រទេសផ្សេងទៀតតាមឆន្ទៈ ដោយចេញសាលក្រមឯកតោភាគី ទាំងចៅក្រម និងគណៈវិនិច្ឆ័យ ។
អ្នកនាំពាក្យអ៊ីរ៉ង់រូបនេះបានកត់សម្គាល់ថា “ទីក្រុងវ៉ាស៊ីនតោន បានឈ្លានពានអាហ្វហ្គានីស្ថាន ធ្វើឱ្យមានការខាតបង់ ដោយប្រយោល និងចំណាយប្រាក់រាប់ពាន់លានដុល្លារ លើប្រជាជនអាហ្វហ្គានីស្ថានស្លូតត្រង់ និងគ្មានទីពឹង ក៏ដូចជាអ្នកបង់ពន្ធអាមេរិក” ។
និយាយអំពីវិធានការរបស់អ៊ីរ៉ង់ ក្នុង ការធ្វើជាម្ចាស់ផ្ទះទទួលជនភៀសខ្លួនអាហ្វហ្គានីស្ថានលោក Khatibzadeh បានលើកឡើងថា ប្រទេសរបស់លោកបានកាន់កាប់ ជនជាតិអាហ្វហ្គានីស្ថាន ចំនួន ៤,៥លាននាក់។
បន្ទាប់ពីការដកទ័ពរបស់ខ្លួនចេញពីប្រទេសអាហ្វហ្គានីស្ថានក្នុងខែសីហា ឆ្នាំ២០២១ សហរដ្ឋអាមេរិក បានបង្កកទ្រព្យសម្បត្តិជិត ១០ពាន់លានដុល្លាររបស់ធនាគារ កណ្តាល របស់ប្រទេសអាហ្វហ្គានីស្ថាន ដែលធ្វើឲ្យមានវិបត្តិសេដ្ឋកិច្ច និងភាពក្រីក្រកាន់តែអាក្រក់ នៅក្នុងប្រទេសអាស៊ីដែលហែកហួរ ដោយសង្រ្គាមមួយនេះ៕
ដោយ ឈូក បូរ៉ា
