ទីភ្នាក់ងារអង្គការសហប្រជាជាតិ នៅទីក្រុងហ្សឺណែវ សម្ដែងព្រួយបារម្ភ អំពីស្ថានភាព នៅអ៊ុយក្រែន

ហ្សឺណែវ ៖ ទីភ្នាក់ងារជាច្រើនរបស់អង្គការ សហប្រជាជាតិ (UN) នៅទីក្រុងហ្សឺណែវ កាលពីថ្ងៃអង្គារ បានសម្តែងការព្រួយបារម្ភ របស់ពួកគេលើការ អភិវឌ្ឍន៍ចុងក្រោយបង្អស់ នៅក្នុង ប្រទេសអ៊ុយក្រែន ដោយបានអំពាវនាវ ឱ្យភាគីទាំងអស់ បញ្ឈប់អរិភាព និងត្រួសត្រាយផ្លូវ សម្រាប់ការសន្ទនាជាជាងកំណត់ ដំណាក់កាល សម្រាប់អំពើហិង្សាបន្ថែមទៀត។

លោក Jens Laerke អ្នកនាំពាក្យការិយាល័យសម្របសម្រួល កិច្ចការមនុស្សធម៌របស់អង្គការ សហប្រជាជាតិ បានប្រាប់សន្និសីទសារព័ត៌មានថា ការិយាល័យបានទទួលរបាយការណ៍ អំពីការកើនឡើងនៃអសន្តិសុខនៅភាគខាងកើតអ៊ុយក្រែន ក្នុងបរិបទនៃអរិភាព ដែលបានបន្តអស់រយៈពេល ៨ឆ្នាំកន្លងមកនេះ ។

លោកបានកត់សម្គាល់ថា “យើងបានឃើញរបាយការណ៍ ការកើនឡើងនៃអរិភាព ដែលប្រាកដណាស់ យើងសូមអំពាវនាវដល់គ្រប់ភាគីទាំងអស់ ឱ្យការពារជនស៊ីវិល និងការពារហេដ្ឋារចនាសម្ព័ន្ធស៊ីវិល ក្នុងស្ថានភាពប្រែប្រួលខ្លាំងនេះ”។

លោកបានប្រាប់អ្នកសារ ព័ត៌មានថា នៅថ្ងៃទី១៨ ខែកុម្ភៈ ថាក្បួនរថយន្តមួយបានបញ្ជូនការផ្គត់ផ្គង់ មនុស្សធម៌ទៅកាន់តំបន់ ដែលមិនមែនជាការគ្រប់គ្រង ដោយរដ្ឋាភិបាល ក្នុងប្រទេសនេះ ទោះបីជាយ៉ាងណាក៏ដោយ មូលនិធិនៅតែមានរយៈពេលខ្លី ហើយសហគមន៍អន្តរជាតិ ត្រូវបានជំរុញឱ្យ ផ្តល់ធនធានបន្ថែម។

លោក Shabia Mantoo អ្នកនាំពាក្យ របស់ទីភ្នាក់ងារជនភៀសខ្លួនអង្គការ សហប្រជាជាតិ (UNHCR) បានឲ្យដឹងនៅក្នុងសន្និសីទ សារព័ត៌មានដដែលថា UNHCR បានបន្តតាមដានយ៉ាង ដិតដល់នូវអ្វីដែលជា “ស្ថានភាពប្រែប្រួល និងមិនអាចទាយទុកជាមុនបាន” ហើយបានត្រៀមខ្លួនរួចជាស្រេច ដើម្បីបំពេញតម្រូវការមនុស្ស ធម៌ថ្មីណាមួយដែលអាចកើតឡើង ៕

ដោយ ឈូក បូរ៉ា