គៀវ៖ ប្រធានាធិបតីអ៊ុយក្រែន លោក Volodymyr Zelensky បានព្រមានថា រុស្ស៊ីអាចចាប់ផ្តើម “សង្រ្គាមដ៏ធំនៅអឺរ៉ុប” នៅថ្ងៃណាមួយ ឬនៅពេលឥឡូវនេះ ហើយបានអំពាវនាវ ឱ្យប្រជាជនរុស្ស៊ី ប្រឆាំងនឹងសង្គ្រាមនេះ បន្ទាប់ពីលោក ពូទីន បានប្រកាសពីប្រតិបត្ដិការសង្គ្រាមនៅក្រៅប្រទេស ហើយជំរុញ ឲ្យកងទ័ពអ៊ុយក្រែន ដាក់អាវុធសុំចុះចាញ់ ។
នៅក្នុងសុន្ទរកថាកាលពីយប់ជ្រៅ លោក Volodymyr Zelensky បានឲ្យដឹងថា លោកបានស្វែងរកការចរចាជាមួយប្រធានាធិបតីរុស្ស៊ីលោក វ្លាឌីមៀ ពូទីន ផងដែរ តែមិនបានជោគជ័យទេ។
លោក Zelensky បានលើកឡើងថា “ខ្ញុំបានផ្តួចផ្តើមការហៅទូរស័ព្ទ ជាមួយប្រធានសហព័ន្ធរុស្ស៊ី ។ លទ្ធផល៖ ស្ងាត់ជ្រាប” ។ លោកបាននិយាយថា រុស្ស៊ីមានទាហានជិត ២០ម៉ឺននាក់ និងរថយន្តប្រយុទ្ធរាប់ពាន់គ្រឿង នៅតាមព្រំដែនអ៊ុយក្រែន ។
ហើយការប្តូរពីអ៊ុយក្រែន ទៅជាភាសា រុស្សី លោក Zelensky បានធ្វើការអំពាវនាវ យ៉ាង រំជើបរំជួលដល់រុស្ស៊ីឱ្យបដិសេធ ការវាយប្រហារដោយនិយាយថា ពួកគេត្រូវបានគេកុហកអំពីអ៊ុយក្រែន ។
ដោយឡែកប្រធានាធិបតីអាមេរិកលោក ចូ បៃដិន បានត្រឹមសម្ដែងការសោកស្ដាយនៅលើបណ្ដាញសង្គមហ្វេសប៊ុក របស់លោកនៅមុននេះបន្ដិច ចំពោះការប្រកាសសង្គ្រាមប្រឆាំងអ៊ុយក្រែន ដោយប្រទេសរុស្ស៊ី ដោយមិនទាន់ឃើញមានការឆ្លើយតបណា មួយពីមហាអំណាចអាមេរិក និងសម្ព័ន្ធមិត្ដណាតូនៅឡើយទេ។
ប្រធានាធិបតីអាមេរិកលោក ចូ បៃដិន បានឲ្យដឹងនៅលើបណ្ដាញសង្គមរបស់លោកថា ការអធិស្ឋាន របស់ពិភពលោកទាំងមូល គឺនៅជាមួយប្រជាជន អ៊ុយក្រែននៅយប់នេះ ខណៈដែលពួកគេទទួលរងការវាយ ប្រហារដោយអយុត្តិធម៌ ដោយកងកម្លាំងយោធារុស្ស៊ី។
នៅក្នុងសាររបស់ប្រធានាធិបតីអាមេរិករូបនេះ បានឲ្យដឹងថា ប្រធានាធិបតីរុស្ស៊ីលោក ពូទីន បានជ្រើសរើសសង្រ្គាម ដែលបានគិតទុកជាមុន ដែលនឹងនាំមកនូវមហន្តរាយដល់ជីវិត និងការឈឺចាប់របស់មនុស្ស។
លោកបានព្រមានថា “រុស្សីតែម្នាក់គត់ជាអ្នកទទួលខុសត្រូវចំពោះការស្លាប់ និងការបំផ្លិចបំផ្លាញ ការវាយប្រហារនេះនឹងនាំមកនូវ ហើយសហរដ្ឋអាមេរិក និងសម្ព័ន្ធមិត្ត និងដៃគូរបស់ខ្លួននឹងឆ្លើយតបដោយឯកភាព និងការសម្រេចចិត្ត។ ពិភពលោកនឹងទទួលខុសត្រូវ លើប្រទេសរុស្ស៊ី”។
លោកបានបញ្ជាក់ថា “ខ្ញុំនឹងតាមដានស្ថានការណ៍ពីសេតវិមាននៅល្ងាចនេះ ហើយនឹងបន្តទទួលបានព័ត៌មានថ្មីៗជាប្រចាំពីក្រុមសន្តិសុខជាតិរបស់ខ្ញុំ។ ថ្ងៃស្អែក ខ្ញុំនឹងជួបជាមួយសមភាគី G7 របស់ខ្ញុំនៅពេលព្រឹក ហើយបន្ទាប់មកនិយាយទៅកាន់ប្រជាជនអាមេរិក ដើម្បីប្រកាសអំពីផលវិបាកបន្ថែមទៀត ដែលសហរដ្ឋអាមេរិក និងសម្ព័ន្ធមិត្ត និងដៃគូរបស់យើងនឹងដាក់លើរុស្ស៊ី ចំពោះទង្វើឈ្លានពានដែលមិនចាំបាច់នេះប្រឆាំងនឹងអ៊ុយក្រែន និងសន្តិភាព និងសន្តិសុខពិភពលោក”។
លោកបានបញ្ជាក់បន្ថែមថា “យើងក៏នឹងសម្របសម្រួលជាមួយសម្ព័ន្ធមិត្តណាតូរបស់យើងផងដែរ ដើម្បីធានាបាននូវការឆ្លើយតបដ៏រឹងមាំ និងរួបរួមដែលរារាំងការឈ្លានពានណាមួយប្រឆាំងនឹងសម្ព័ន្ធ។ យប់នេះ Jill និងខ្ញុំកំពុងអធិស្ឋានសម្រាប់ប្រជាជនអ៊ុយក្រែនដ៏ក្លាហាន និងមោទនភាព”៕
