គៀវ៖ មន្ត្រីអ៊ុយក្រែនម្នាក់បានឲ្យដឹងថា កងកម្លាំងរុស្ស៊ីបានបង្កើនការបាញ់ផ្លោងទៅលើទីក្រុងនានានៅកណ្តាល ភាគខាងជើង និងខាងត្បូងរបស់ប្រទេសអ៊ុយក្រែន ដោយបង្កើនការប៉ុនប៉ងជម្លៀសជនស៊ីវិល ដែលត្រូវបាន ឡោមព័ទ្ធ ជាមួយនឹងមេដឹកនាំអ៊ុយក្រែន ជំរុញប្រជាជនរបស់លោកឱ្យប្រយុទ្ធនៅតាមដងផ្លូវ ខណៈប្រធានាធិបតីរុស្ស៊ីលោក វ្ល៉ាឌីមៀ ពូទីន បានផ្លាស់ប្តូរការស្តីបន្ទោសចំពោះការលុកលុយដោយលើកឡើងថា ការវាយប្រហាររបស់ទីក្រុងម៉ូស្គូ អាចត្រូវបានបញ្ឈប់ “លុះត្រាតែទីក្រុងគៀវ បញ្ឈប់អរិភាព”។
ទីប្រឹក្សាប្រធានាធិបតីលោក Oleksiy Arestovich បានលើកឡើងថា ជាយក្រុងគៀវ ក្នុងតំបន់ Chernihiv នៅភាគខាងជើង ទីក្រុង Mykolaiv នៅភាគខាងត្បូង និងទីក្រុង Kharkiv ដែលជាទីក្រុងធំទីពីររបស់ប្រទេសនេះ បានប្រឈមមុខនឹងការបាញ់ផ្លោងកាលពីល្ងាចថ្ងៃអាទិត្យ។
យោងតាមមន្ត្រីក្នុងតំបន់បានឱ្យដឹងថា កាំភ្លើងធំបានវាយប្រហារតំបន់លំនៅដ្ឋានក្នុងទីក្រុង Kharkiv ហើយការបាញ់ផ្លោងបានបំផ្លាញប៉មទូរទស្សន៍មួយកន្លែងទៀត នេះបើយោងតាមការចុះផ្សាយរបស់ទីភ្នាក់ងារសារព័ត៌មាន AP។
ក្រសួងការពារជាតិ អង់គ្លេស បាននិយាយអំពីយុទ្ធសាស្ត្រ របស់រុស្ស៊ីថា “នេះទំនងជាតំណាងឲ្យកិច្ចប្រឹងប្រែងមួយ ដើម្បីបំបែក សីលធម៌របស់អ៊ុយក្រែន »”។ ការប្រយុទ្ធគ្នាបានបណ្តាលឱ្យមនុស្ស ១,៥លាននាក់ភៀសខ្លួនចេញពីប្រទេស ដែលប្រធានទីភ្នាក់ងារជនភៀសខ្លួនរបស់អង្គការសហប្រជាជាតិបានហៅថា “វិបត្តិជនភៀសខ្លួន ដែលកំពុងរីកចម្រើនលឿនបំផុតនៅអឺរ៉ុប ចាប់តាំងពីសង្គ្រាមលោកលើកទីពីរ”។
ការវាយប្រហារថ្មីៗបំផុតបានធ្វើឱ្យមានក្តីសង្ឃឹមថាមនុស្សកាន់តែច្រើនអាចគេចផុតពីការប្រយុទ្ធគ្នាក្នុងប្រទេសអ៊ុយក្រែន ជាកន្លែងដែលផែនការរបស់រុស្ស៊ីក្នុងការវាយលុកប្រទេសយ៉ាងឆាប់រហ័សត្រូវបានរារាំងដោយការតស៊ូយ៉ាងខ្លាំងក្លា។ រុស្ស៊ីបានឈានទៅមុខយ៉ាងសំខាន់នៅភាគខាងត្បូងអ៊ុយក្រែន និងតាមឆ្នេរសមុទ្រ ប៉ុន្តែកិច្ចខិតខំប្រឹងប្រែងជាច្រើនបានជាប់គាំង រួមទាំងក្បួនរថយន្តយោធាដ៏ធំ ដែលស្ទើរតែគ្មានចលនាអស់រយៈពេលជាច្រើនថ្ងៃនៅភាគខាងជើងនៃទីក្រុងគៀវ។
ស្បៀងអាហារ ទឹក ថ្នាំពេទ្យ និងការផ្គត់ផ្គង់ស្ទើរតែទាំងអស់ គឺខ្វះខាតយ៉ាងខ្លាំងនៅក្នុងទីក្រុងកំពង់ផែ Mariupol ភាគខាងត្បូងប្រទេសអ៊ុយក្រែន ជាកន្លែងដែលកងកម្លាំងរុស្ស៊ី និងអ៊ុយក្រែន បានយល់ព្រមលើបទឈប់បាញ់រយៈពេល ១១ម៉ោង ដែលនឹងអនុញ្ញាតឱ្យជនស៊ីវិល និងអ្នករបួសត្រូវបានជម្លៀសចេញ ប៉ុន្តែដោយសារការវាយប្រហាររបស់រុស្ស៊ី បានបិទច្រករបៀងមនុស្សធម៌យ៉ាងឆាប់រហ័ស។
ទីប្រឹក្សាក្រសួងមហាផ្ទៃលោក Anton Gerashchenko បានឲ្យដឹងនៅលើបណ្ដាញ Telegram ថា “វាមិនអាចមាន “ច្រករបៀងពណ៌បៃតង” នោះទេ ពីព្រោះមានតែខួរក្បាលដែលឈឺរបស់ជនជាតិរុស្សីជាអ្នកសម្រេចចិត្តថាត្រូវចាប់ផ្តើមបាញ់ប្រហារនៅពេលណា៕
